Шымкентте қызылша жұқтырғандардың басым бөлігі — балалар.
Шымкент қаласында өткен жылы қызылша ауруын жұқтырғандар саны 3000 асып кеткен. Ал, биылғы жыл басынан бүгінгі күнге дейін 250 жағдай тіркеліп отыр.
Оның 199-ы, яғни 79,6 пайызы — 14 жасқа дейінгі балалар.
Қосымша жаппай иммундау науқаны басталғалы қалада барлығы 115 588 адам егумен қамтылған.
Қазіргі кезде бұл бағыттағы жұмыс тоқтаусыз жүріп жатыр.
Шымкент қаласының бас мемлекеттік санитария дәрігері Әбдіманап Төлебаев тұрғындар арасында вакцинаның кез келген түріне сенімсіздікпен қарайтындар көбейіп кеткенін жеткізді.
Олар вакцина алғанша ауырғанды жөн көреді.
«Елімізде қызылша ауруының белең алып тұрғаны белгілі. Қызылшаның арнайы емі жоқ және асқыну салдары орасан, сондықтан бұл қауіпті инфекциядан қорғанудың жалғыз жолы — вакцина алу. Қызылша ауруы иммундық жадты өшіру қабілетімен белгілі, вакцина алғаннан немесе бұрын болған аурулардан кейін жинақталған иммунитетті әлсіретеді. Яғни, ағза жаңа инфекцияларға анағұрлым осал болады. ЖРВИ, тұмау және COVID-19 сияқты басқа инфекцияларын жұқтырып, ауыру қаупін арттырады», — дейді Шымкент қаласының бас мемлекеттік санитариялық дәрігері Әбдіманап Төлебаев.
Todayinfo.kz
