Ұлы Жеңістің 80 жылдығы – адамзаттың есінде мәңгі сақталатын маңызды және тағылымды дата. Бұл мерекені әр жыл сайын ұлықтап, майдангерлердің ерлігі мен батырлығын еске алып, олардың кейінгі ұрпаққа қалдырған мұрасын құрметтейміз. Биыл мерекенің 80 жылдығы атап өтіледі. Осыған орай, Түркістан облысы Ордабасы ауданында Полиция департаментінің бастығы Мұрат Қабденов, Түркістан облысының прокуроры Мұрат Тлеубердиев және 8-сынып оқушылары ғасыр куәсі болған Ұлы Отан соғысының ардагері, 101 жастағы Қалмен Мұратұлы атамыздың шаңырағында болды, деп хабарлайды Todayinfo ақпараттық агенттігі Түркістан облысының әкімінің баспасөз қызметіне сілтеме жасап.
Қалмен Мұратұлы 1924 жылы дүниеге келген. Ол сұрапыл соғысқа 8 сынып оқып жүрген кезінде аттанады. 1941 жылы майдан даласына барып, неміс басқыншыларымен қиян-кескі шайқастарға қатысқан. 1944 жылдың ақпан айында Витебск қаласының маңында болған ұрыста сол қолынан жарақат алып, госпитальға жіберіледі. Осылайша елге ІІ-ші топтағы мүгедек болып оралған.
Кездесуге келген жас сақшылар мен басқа да қатысушылар Қалмен Мұратұлының өмір жолынан көп нәрсе үйреніп, соғыстың ауыр кезеңін, батырлардың ерен ерлігін, сондай-ақ ел үшін күресудің мәнін терең түсінгені сөзсіз. Әсіресе, жас ұрпаққа ардагердің айтқан өнегелі әңгімелері үлкен әсер қалдырды. Қалмен атамыз өз заманындағы қиындықтарға мойымау, әрқашан алға ұмтылу, ел үшін жанын құрбан етуге дайын болу туралы көп айтты.
Бүгінде 101 жасқа келген майдангер өмірлік жұбайымен 6 ұл, 2 қыз тәрбиелеп өсірген. Олардан 32 немере, 85 шөбере сүйіп отыр.
Майдангермен кездесуде Түркістан облысының прокуроры Мұрат Тлеубердиев пен Полиция департаментінің бастығы Мұрат Қабденов Қалмен атамызға жоғары құрмет көрсетіп, оның ерлігін ұлықтады. Сонымен қатар, генерал Мұрат Талапұлы ғасыр жасаған майдангерге денсаулық, отбасына амандық пен құт-береке тілеп, сый-сияпат табыстады. Өзінің өнегелі әңгімелерін жас сақшыларға арнаған қария, генерал бастаған ұжымға алғысын білдірді.
