2024 жылы Алматы қаласының экономикасы 2021 жылмен салыстырғанда 20,7 пайызға өсті, деп хабарлайды Todayinfo ақпараттық агенттігі.
Жан басына шаққандағы жалпы өңірлік өнім 56,6 пайызға артып, 27 557 АҚШ долларын құрады. Салыстыру үшін, 2021 жылы бұл көрсеткіш 17 595 АҚШ долларын құраған.
Алматы еліміздің инвестициялық орталығы ретіндегі мәртебесін сақтап отыр. 2022–2024 жылдар аралығында қала экономикасына негізгі капиталға шамамен 5,2 триллион теңге көлемінде инвестиция тартылған. Бұл көрсеткіш 2021 жылмен салыстырғанда 52,4 пайызға жоғары.
Шағын және орта бизнес Алматының экономикалық дамуының негізгі қозғаушы күшіне айналған. Бұл сектордың қала экономикасындағы үлесі 2021 жылғы 47,5 пайыздан 2024 жылы 60,3 пайызға дейін өскен.
Сондай-ақ шағын және орта бизнес секторы жұмыспен қамтудың басты көзі ретінде қала береді. Қазіргі таңда бұл салада Алматыдағы жұмыспен қамтылған халықтың 90 пайызы немесе 972,1 мың адам еңбек етуде.
2025 жылы алғаш рет Алматы қаласының бюджеті 2,4 триллион теңгеден асты. Бұл 2022 жылдың басымен салыстырғанда 2,3 есе артық. Айта кетейік, 2022 жылы бюджет көлемі 1 070 миллиард теңгені құраған.
Қаланың даму бюджеті де айтарлықтай ұлғайды. 2024 жылы бұл көрсеткіш 622 миллиард теңгеге жетіп, 2022 жылмен салыстырғанда 2,9 есеге артты. Аталған жылы даму бюджеті 213 миллиард теңге болған.
