Степногор қалалық сотында Бахытжан Байжановтың жазасын қысқарту туралы амнистия негізінде берген өтініші қаралды. Бұрынғы ұлттық экономика министрі Қуандық Бишімбаевтың ағасы бұл процеске бұқаралық ақпарат құралдарын қатыстырмауды жөн көрді. Алайда сот төрағасы Акишев бұл өтінішті қабылдамай, отырысты ашық өткізді,деп хабарлайды Todayinfo ақпараттық агенттігі Qaz365.kz-ке сілтеме жасап.
Сот шешімі бойынша Байжановтың жазасының үштен бір бөлігі қысқарды — бұл шамамен 8 ай және 8 күн. Осылайша, ол бастапқыда 2027 жылдың 18 шілдесінде босатылуы тиіс болса, енді 2026 жылдың қарашасында мерзімінен бұрын бостандыққа шығады.
Байжанов жазасын өтеп жатқан мекеме өкілдерінің берген оң сипаттамасы және азаматтық талаптардың толық өтелуі сот шешіміне әсер етті.
«Сотталған азамат түзеу мекемесінде өзін жақсы жағынан көрсетті. Мінез-құлқы бойынша бірінші оң деңгейге ие, екі мәрте ынталандырылған. Сот үкімімен белгіленген өтемақылар толықтай өтелген», — делінген материалда.
Прокурор да осы мәліметтерді негізге ала отырып, өтінішті қанағаттандыруды сұрады.
Бахытжан Байжанов — бұрынғы Ұлттық экономика министрі Қуандық Бишімбаевтың туған ағасы. Екеуі де Салтанат Нүкенованың өліміне байланысты қылмыстық іске тартылған.
Бахытжан Байжанов аса ауыр қылмысты жасыру бабы бойынша айыпталып, 4 жылға сотталған. Ол өз кінәсін мойындамаған және апелляциялық шағым түсіргенімен, сот үкімі өзгеріссіз қалдырылған болатын.
