Фото: facebook.com/KazakhstanMFA
Бұрын сотты болған шенеуніктің ұлы президент әкімшілігінде қызметке тағайындалды, деп хабарлайды Todayinfo.kz ақпарат агенттігі.
Ақорданың баспасөз қызметі мемлекет басшысының өкімімен президент әкімшілігінің сыртқы саясат бөлімінің меңгерушісі лауазымына Жандос Бақытбекұлы Иманалиевтің тағайындалғанын хабарлады.
Басылымның мәліметінше, Жандос Иманалиевтің әкесі Бақытбек Иманалиев кезінде «Нұр Отан» партиясының мүшесі болған, Жамбыл облысы әкімінің орынбасары қызметін атқарған. Сондай-ақ Назарбаев кезінде президент әкімшілігінде де жұмыс істеген көрінеді.
Бұдан бөлек, Бақытбек Иманалиев бірнеше жыл бұрын белгілі «бұқтырылған ет ісі» бойынша сотталған. Ол мемлекеттік материалдық резервтер комитетінің төрағасы болып қызмет арқарған кезеңде қол астындағыларымен бірге 6,5 миллиард теңгені ысырап еткен. Антикордың мәліметінше, 2018 жылы комитет мемлекеттік стандартқа сай келмейтін, сапасыз, сиыр етінің орнына соя еті қосылған бұқтырылған ет сатқан.
Осы іс бойынша Бақытбек Иманалиев сегіз жылға сотталып, өмір бойы мемлекеттік қызметте жұмыс істеу құқығынан және тұңғыш президенттің қолынан алған барлық марапаттарынан айырылған.
Алайда сегіз жылдың орнына бұрынғы шенеунік түрмеде небәрі бір жыл ғана отырып, денсаулығына байланысты жазадан босатылған.
