Спорт журналисі, сарапшы Руслан Меделбек: «Кейінгі кезде спортшылардың мемлекетке қол жайып, сұрамшақтанып, ақша, үй, көлік бермеді деген сөздерін жиі көріп жүрміз. Чемпион болғанда мемлекеттен сыйын алып, кейін карьерасын аяқтаған соң да елге қол жаятындар да бар. Спортшы құрамаға енгені үшін жалақы, облыстардан стипендия алады. Осының өзі олардың еңбегінің төлеуі болуы керек. Мемлекеттен бір, облыстан бір сыйақы алғысы келіп тұратын синдромнан арылған жөн. Спорт шенеуніктері бұл манипуляцияға (манипуляция деп білем) алданбай бұқаралық спортқа көңіл бөлуі тиіс» деген пікірін жеткізді.
Русланның айтуынша оның өзі тұрып жатқан Чехияда спортшылар мемлекетке қол жаймайды. Олимпиада жүлдесіне мемлекеттен сыйақы беріледі. Ал әлем чемпионатында медаль алса федерациялар ақша беріп жатады. Федерация спортшыларға ақша беру үшін демеуші табуы керек. Ақша сол демеушілерден беріледі. Мұнда спортшының жүлдесі — оның жеке жетістігі. Жүлде алдың демеушің көбейеді, жарнамаға түсіп ақша табасың. Жүлдең жарнама нарығына жол ашады. Ал мемлекет бұқаралық спортқа жол ашуы тиіс. Қазір мұнда теннис, футбол, хоккей, биатлон, коньки, жеңіл атлетика бұқараға ашық. Мемлекет субсидияны балалар спортына береді. Теннис корттары, мұз айдын, футбол, волейбол, баскетбол алаңдары көп.
Ал бұған журналист Нұрсейіт Жылқышыбай келіспейді.
«Бауырым, ән ұранымызды әлемдік аренада шырқатып, абыройымызды асқақтатқан азаматтарға екінші мүмкіндік берілу керек… Қазақтың баласын чехтар мен салыстырудың қажеті жоқ!» деген пікірін жеткізді Н. Жылқышыбай.
«Бұған қоса, спорт абономенттері бар. Айына ересектерге 1000-1500 крон (25-40 мың теңге), балаларға 500 крон (13 мың теңге) болады. Картамен елдегі көп спорт залдарына күнде баруға болады. Кейбір компаниялар жұмысшыларына әлеуметті көмек ретінде бұл карталарды тегін береді. Картаң болса кез келген қаладан бассейн, теннис, массаж, коньки, йога тауып алып, бара бересің. Медсақтандыру сияқты. Көп спорт кешендері абономентпен кіргізеді. Картасыз барса айына 100-200 мың теңге шығады.
Елге медаль, жүлде емес халықтың денсаулығы, бұқаралық спорттың дамығаны маңызды. Жеңілсе ел жеңілісті оңай қабылдайды, жеңсе қуанады.
Спортшылардың манипуляция жасауына кейде әріптестер, спорт журналистері де үлес қосып жүр. Сұхбатта «мемлекет не берді?» деп отты көсеп отырады. Қоғам, ел, мемлекет спортшыға чемпион болуға жағдай жасады. Қоғам мен мемлекеттік міндеті жағдай жасау, нәтиже көрсету спортшыдан. Жеңіп келсе мемлекет аяп та жатқан жоқ» дейді журналист.
