Жайық өзеніндегі су деңгейінің көтерілуіне байланысты Орал қаласы маңындағы 1-саяжай және 2-саяжай бау-бақша серіктестіктеріндегі тұрғын үйлерді су басу қаупі туындады.
БҚО ТЖ департаментінің баспасөз қызметінен мәлімет еткендей, осыған орай полиция департаменті және жергілікті атқарушы органдармен бірлесе отырып, бірнеше күн бойы тұрғындарға ескерту парақшалары таратылып, түсіндіру жұмыстары жүргізілді.
Фото: БҚО ТЖД
«Эвакуациялау жұмыстарына барлығы 150 адам, 12 техника, 1 жүзу құралы тартылды. Соның ішінде ТЖ министрлігінен 118 адам, 11 техника, Ішкі істер министрлігінен 32 адам (1 техника) жұмылдырылды. Қазірге дейін 22 адам көшірілсе, соның алтауы – бала. Тұрғындардың бірқатары туыстарының үйіне кетсе, бірқатары эвакуациялық пункттерге орналастырылды», — деп хабарлады ведомстводан.
Фото: БҚО ТЖД
Батыс Қазақстан облысы әкімдігінің мәліметінше, Жайық өзені жайылмаларында орын тепкен 54 бау-бақша серіктестігінде 1 600 отбасы тұрады. Су басу қаупінің төнуіне байланысты әрі эвакуациялау жұмыстарын кедергісіз жүргізу үшін бау-бақша серіктестіктері 8 сәуірден бастап электр қуаты мен газдан ажыратылды.
