Фото: Instagram/si12.rt
Томирис Нұрмағамбетова әлеуметтік желіде видеоүндеу жариялап, күйеуі Әнуар Арманұлы Нұрмағамбетовтен бір жыл бойы қорлық көріп келе жатқанын мәлімдеді. Айтуынша, ер адам оны аңдып, үнемі «өлтіремін» деп қорқытып жүрген, деп хабарлайды Todayinfo.kz ақпарат агенттігі.
Әйелдің сөзінше, күйеуі бірнеше рет заңсыз әрекетке барған: пәтеріне рұқсатсыз кіріп, ішінде күтіп отырған, тіпті күндіз көше ортасында шабуыл жасап, көлігін тартып алған. Осы оқиғадан соң ол полицияға арыз жазуға ниеттенген.
«Бір жылдан бері өміріме қауіп төндіріп келеді. Қол да көтерген кездері болды. Амалым құрып, Павлодардан көшіп кетуге тура келді. Бұл әділетсіздікке төзе алмаймын, ел «қаһармандарын» білсін!» – дейді Томирис.
Оның айтуынша, күйеуі қоғамда өзін «Бишімбаев 2» деп танытып, бұрын сот жүйесінде істегенін және таныс-білістерін пайдаланып жүргенін жасырмайды. Сондай-ақ ол ажырасуға келісім бермей, түрлі қысым көрсетіп, бопсалап келген.
Деректерге сүйенсек, Томирис Қанатқызының өзі де Павлодар қаласы ҰҚК департаментінің бұрынғы жоғары лауазымды қызметкерінің қызы.
