Алматы облысының прокуратурасы Талғар ауданы полициясының күдіктіні босатқаны үшін қылмыстық іс қозғалғанын хабарлады. Ол күдікті әйелді зорлады деген айыппен ұсталған, алайда босатылған соң жәбірленушінің ағасын атып өлтіріп, оның кішкентай қызын ұрлап кеткен, деп хабарлайды Todayinfo.kz.
Ресми хабарламада былай делінген:
«Облыс прокуратурасымен Талғар ауданы полиция басқармасы лауазымды тұлғаларының әрекетсіздігі (ҚК 370-бабы, 4-бөлігі) бойынша қылмыстық іс қозғалды. Олар зорлау күдігімен ұсталған азаматты уақытылы қамауға алмауы салдарынан ол Талғар ауданы, Қызыл-қайрат ауылында ер адамды атып өлтіріп, кәмелетке толмаған қызды ұрлап кеткен».
Іс арнайы прокурорлардың өндірісінде, тергеу барысы облыс прокуратурасының ерекше бақылауында болады.
Сонымен бірге прокуратура жалған ақпарат таратқандар заң алдында жауапқа тартылатынын ескертіп, тек ресми дереккөздерге сенуді сұрады.
Қылмыстық-процестік кодекстің 201-бабына сәйкес өзге ақпарат жарияланбайды.
Оқиғаға қатысты деректер:
-
Талғарда ұрланған кішкентай қызға дәрігерлер ота жасап, тіліне сегіз тігіс салды. Бұл туралы адвокат Гаухар Сариева әлеуметтік желідегі парақшасында жазды.
-
Оның айтуынша, қылмыскер баламен бірге көлігін жардан тастап жіберген, сол сәтте бала жарақат алған.
-
Жәбірленуші — медбике. Қылмыс кезінде ол онкологиялық науқасқа жүйе қойып, көршінің үйінде болған.
6 қыркүйекте болған қылмыс:
Қызыл-қайрат ауылында ер адам жергілікті тұрғынды атып өлтіріп, оның кішкентай жиенін ұрлап кеткен. Сол күні арнайы жасақ баланы құтқарып, анасымен қауыштырды. Күдікті ұсталды.
Адвокат Сариева жариялаған деректер:
-
Жәбірленуші — оның туған сіңлісі.
-
Күдікті — автосервис жұмысшысы. Шамамен бір ай бұрын оны зорлады деп айыптаған, бірақ полиция еш шара қолданбаған.
-
Адвокат пен жұбайы екі күн бұрын күдіктіні ұстап, полицияға тапсырған, алайда келесі күні оны босатып жіберген.
-
Осыдан кейін күдікті жәбірленушіге қоңырау шалып, қоқан-лоққы жасаған. Кейін оның ағасының үйіне барып, атып өлтірген және екі жасар қызды ұрлап кеткен.
