Ауғанстан мен Өзбекстан шекарасында орналасқан «Термез» халықаралық сауда орталығына енді 40 жасқа дейінгі қыз-келіншектер кіре алмайды. Мұндай шектеуді Ауғанстандағы «Талибан» билігі енгізді, деп хабарлайды Todayinfo ақпараттық агенттігі.
Бұған дейін ауған азаматтарына аталған кешен аумағында визасыз 15 күнге дейін жүруге рұқсат берілген болатын. Сауда орталығында төрт мыңға жуық дүкен, мейрамхана, медициналық қызмет көрсету пункттері мен өндірістік аймақтар жұмыс істейді. Жергілікті тұрғындар бұл кешенге отбасымен келіп, сауда-саттық жүргізіп жүрген.
Алайда жаңа талап енгізілгеннен кейін келушілер күрт азайып, кәсіпкерлер табыс көзінен айырылды. Себебі орталықтың негізгі клиенттері — жас әйелдер болған.
Бұл шешім Ауғанстандағы әйелдердің қоғамдық өмірге араласуын шектеуге бағытталған жалпы саяси ұстанымның жалғасы саналады. 2021 жылы билікке келгеннен бері тәліптер қыз балалардың білім алуына, жұмыс істеуіне, спортпен шұғылдануына, ән айтуына және үкіметтік емес ұйымдарда еңбек етуіне тыйым салды. Сонымен қатар, Әйелдер істері жөніндегі министрлік те таратылды.
Аталған тыйым халықаралық ұйымдардың сын-ескертпелеріне қарамастан жүзеге асырылып отыр. Сарапшылар бұл шешім аймақтық сауда мен гендерлік теңдікке елеулі соққы деп бағалап отыр.
