Арыс қаласында табиғатты қорғау саласында жұмыс істейтін екі мекеме жаңа ғимаратқа ие болды, деп хабарлайды Todayinfo ақпараттық агенттігі.
«Сырдария-Түркістан мемлекеттік өңірлік табиғи паркі» мекемесінің Сырдария филиалына Қожатоғай ауыл округіндегі Есқара ата ауылында жаңа ғимарат берілді. Сырдария өзені маңында орналасқан нысанға қосымша биіктігі жеті метрді құрайтын заманауи бақылау бекеті салынды. Бұл бекет рация арқылы елу шақырымға дейінгі аумақта байланыс орнатуға мүмкіндік береді. Сонымен қатар, бекет маңында үш тікұшақ алаңы да қарастырылған.
«Қорған» жедел қызметіне арнайы ғимарат бөлініп, күрделі жөндеуден өтті. Мекеменің жұмысын күшейту үшін бес патрульдік автокөлік берілді.
Облыс әкімінің орынбасары Нұрбол Тұрашбеков Арыс қаласына жасаған жұмыс сапары барысында жаңартылған нысандарды аралап, мекемелердің қызметімен танысты.
Сапар барысында облыс әкімінің орынбасары Арыс қаласындағы көгалдандыру жұмыстарына ерекше назар аударды. Ол дендросаябақ пен Арыс-Шардара айналма жолының бойына егілген ағаштардың жағдайын тексеріп, «Жасыл Арыс» тұқымбағының жұмысымен танысты.
«Жасыл Арыс» тұқымбағы бір гектар аумақта орналасқан. Қазіргі уақытта мұнда сегіз түрлі ағаштың жүз мыңнан астам көшеті бапталып жатыр. 2022 жылдан бері тұқымбақта дайындалған 168 мыңнан астам көшет пайдалануға берілген. Тұқымбақта толықтай тамшылатып суғару жүйесі орнатылған.
Қаланың кәріз суын тазалау станциясы арқылы пайдаланып, тұқымбақты суғаруға қолдану экологиялық тиімді шешім ретінде бағаланды.
Түркістан облысы әкімінің баспасөз қызметінің мәліметінше, атқарылған жұмыстар өңірдегі экологиялық тұрақтылықты нығайтуға және табиғатты қорғау саласын дамытуға үлес қосуды көздейді.
