Грузия Денсаулық сақтау министрлігі Тбилисидегі парламент жанында шетелдік агенттер туралы заңға қарсы наразылық акциясына шыққан 8 адамның ауруханаға жеткізілгенін мәлімдеді. Бұл туралы NGnewsgeorgia жазды.
Зардап шеккендердің бірі ауруханадан шықты. Жеті адам дәрігерлердің бақылауына алынды. Қазіргі кезде 20 жедел жәрдем бригадасы кезекшілік етуде. Ондаған шерушіге, сондай-ақ ІІМ-нің бір қызметкеріне оқиға орнында көмек көрсетілді.
«Зардап шеккендер түрлі дене жарақатын алды. Оның ішінде бет, бас және дене бөліктерінің жарақаттары бар. Кейбіреулеріне улану және тыныс алу жолдарының асқынуы диагнозы қойылды», — делінген ведомство хабарламасында.
1 мамыр күні кешке Грузия парламенті алдына мыңдаған адам жиналып, заңның кері қайтарылуын талап етті. Арнайы жасақ ғимарат кіреберісінде демонстранттарға қарсы көзден жас ағызатын газ бен су атқыш құрылғылар қолданған. Сондай-ақ резеңке оқтар қолданғаны туралы хабарланды.
БАҚ бұдан зардап шеккендер түсірілген кадрларды көрсеткенімен, Грузияның ІІМ оларды қолданғанын жоққа шығарды.
