Шымкенттегі «Ай Көркем» жекеменшік балабақшасындағы балаларға қатыгездік көрсетудің соңы қылмыстық істің ашылуына түрткі болды. Баласының денесіндегі көгерген іздерге алаңдаған ата-аналар бейнебақылау жазбасын талап етіп, балаларының қалай таяқ жегендерін көргенде арыз жазған еді. Жекеменшік балабақша тәрбиешісінің үстінен қылмыстық іс қозғалып қана қоймай, долы әйел қамауға алынды, деп хабарлайды Todayinfo.
Әлеуметтік желілерде тарап кеткен бейнежазбада Шымкенттегі «Ай Көркем» жекеменшік балабақшасында шамамен екі сағат бойы тәрбиешінің балаларға қатыгездік танытқан.
Ашулы әйел бар өшін кішкентай балақайлардан алған. Ол балаларды сызғышпен ұрып, теуіп, қолдарынан сүйреп, тіпті дәптермен де ұрған. Қылмыстық әрекетінен кейін тәрбиеші ештеңе болмағандай орнына қайта отырып, телефонның қызығына кіріскен.
— 4 маусым күні «Ай Көркем» балабақшасында бұл оқиға орын алды. Бұл фактіні растаймын. Тәрбиешінің көмекшісі мекеменің ішкі бұйрығына сәйкес жұмыстан шығарылды. Тәртіп пен талапты бұзатын қызметкерлер біздің ұжымда жұмыс істей алмайды. Болған жайтқа шын жүректен өкініш білдіремін. Біздің балабақшада балалардың қауіпсіздігі мен тәрбиенің сапасы әрдайым басты назарда, – деді «Ай Көркем» балабақшасының меңгерушісі Нұргүл Мамашәріпова.
Зардап шеккен баланың анасының арызы негізінде полиция қылмыстық іс қозғады. Күдікті ұсталып, уақытша ұстау изоляторына қамалды.
— Қала тұрғыны ұлының соққыға жығылғаны туралы шағыммен жүгінген. Аталған факт бойынша қылмыстық іс қозғалып, күдікті ұсталып, полиция департаментінің уақытша ұстау изоляторына қамалды. Қазір оқиғаның барлық мән-жайын жан-жақты және объективті анықтауға бағытталған кешенді тергеу іс-шаралары жүргізіліп жатыр. Полиция бейнебақылау камераларындағы жазбаларды тексеріп, куәгерлерден жауап алуда. Тергеу барысы полиция департаменті басшылығының ерекше бақылауында, – делінген қалалық полиция департаменті таратқан ақпаратта.
