Төлеби ауданындағы көпбалалы ананың еңбекқорлығы көпшілікті тәнтті етті. Түркістан облысы Төлеби ауданындағы Ақбастау елді мекенінің тұрғыны, көпбалалы ана Ақмарал Есқұлова – мемлекеттік қолдаудың арқасында өз кәсібін ашып, табысқа жетіп отыр, деп хабарлайды Todayinfo ақпараттық агенттігінің тілшісі.
Ол 1 миллион 380 мың теңге көлемінде қайтарымсыз грант алып, арманындағы кәсібін жүзеге асырды. Мемлекеттен алған қаржыны тиімді пайдалану үшін Ақмарал кәдесыйлар мен ойыншықтарды дайындайтын арнайы қалыптар, гипс, бояу және дайын өнімді орайтын қораптар сатып алған. Көп ұзамай, оның еңбегі өз нәтижесін беріп, тапсырыстар саны көбейді. Туған күндер, тойбастар, тұсаукесер, бесікке салу және құдалық сияқты қуанышты күндерге арналған ерекше сыйлықтар мен кәдесыйлар жасау ісі оның негізгі кәсібіне айналды. Сонымен қатар ол үйінің бір бөлмесін шағын шеберханаға айналдырған. Оған ұл-қыздары ойыншықтарды арнайы қалыпқа салып, бояуға көмектеседі. Алдағы уақытта тапсырыс саны артса, кәсібін кеңейтуді жоспарлап отыр.
Ақмаралдың кәсіпкерлікке бет бұруына түрткі болған негізгі себеп – өзінің және балалардың болашағын қамтамасыз ету еді. Кәсіпті ашар алдында ол нарықты зерттеп, сұранысты анықтады. Балаларымен бірге отырып, жаңа өнімдердің үлгілерін ойластырып, кәдесыйлардың дизайндарын жасады. Оның қолынан шыққан әрбір өнім ерекше болып, әр тапсырыс берушінің көңілінен шықты.
Мемлекеттік қолдаудың арқасында өз кәсібін дөңгелеткен Ақмаралдың табысты болуының басты себебі – оның өз ісіне деген сүйіспеншілігі мен шығармашылығы. Ол әрбір клиентке жеке көңіл бөліп, тапсырыстарды уақытында орындап, сапалы өнім ұсынуға тырысады. Жұмысына деген адалдығы мен жауапкершілігі оның кәсіпкер ретінде табысты болуына ықпал етті.
Ақмаралдың айтуынша, өз кәсібін ашу арқылы ол тек өз отбасының әл-ауқатын жақсартып қана қоймай, сонымен қатар, отбасы мүшелерін де жұмыспен қамтып отыр. Оның кәсібіне өз отбасы қолғабыс етіп, өз үлестерін қосуда.
«Кәсібімді одан әрі дамыту үшін ең алдымен өнім түрлерін көбейту және сапасын арттыруға назар аударғым келеді. Еңбек адамды қашанда жетістікке жеткізеді. Мен секілді көпбалалы аналарға қолдау көрсеткен мемлекетімізге өз алғысымды айтамын», — дейді көпбалалы ана Ақмарал Есқұлова.
Ақмаралдың жетістігі көптеген әйелдерге үлгі бола алады. Оның табысты тарихы кез келген қиындықты жеңуге болатынын және өз арманына қол жеткізу үшін күш-жігер қажет екенін көрсетеді. Мемлекеттік қолдау бағдарламалары әйелдерге кәсіпкерлікке бет бұруға, өз істерін ашуға және дамытуға мүмкіндік береді. Ақмаралдың кәсібі осыған айқын дәлел.
Айта кетсек, Төлеби ауданында былтыр ісін жаңадан бастаған жекелеген азаматтарға өз кәсібін ашуға 90 адам қайтарымсыз грант алған. Биылғы жылы да «Еңбек нарығын дамытудың 2024-2029 жылдарға арналған тұжырымдамасы» шеңберінде кәсіпкерлікті дамыту жөніндегі жаңа бизнес идеяларды іске асыруға арналған мемлекеттік қайтарымсыз гранттар берілуде.
