Елімізде Мемлекет басшысы Қасым-Жомарт Тоқаевтың тапсырмасына сәйкес іске асырылып жатқан «Таза Қазақстан» республикалық бағдарламасы аясында Түркістан облысының барлық аудан-қалаларында кең ауқымды экологиялық іс-шаралар жалғасуда, деп хабарлайды Todayinfo ақпараттық агенттігі.
Бүгінгі сенбілік Түркістан облысына қарасты Төлеби ауданында ұйымдастырылды. Бұл жолғы тазалық акциясына тек мемлекеттік қызметкерлер мен жергілікті тұрғындар ғана емес, халықаралық деңгейде ел намысын қорғап жүрген спорт жұлдыздары да атсалысты. Атап айтқанда, шараға әскери самбодан үш дүркін әлем чемпионы, жауынгерлік самбодан әлем кубогының үш мәрте жеңімпазы, бразилиялық джиу-джитсудан екі дүркін Азия чемпионы, ережесіз жекпе-жектерден халықаралық турнирлердің жеңімпазы, Қазақстан Республикасының еңбек сіңірген спорт шебері Арман Оспанов арнайы келіп қатысты.
Тазалық жұмыстары Біркөлік демалыс аймағында өтті. Шараға Төлеби ауданының әкімі Еркеғали Әлімқұлов бастап барған 100-ден астам мемлекеттік қызметкер мен ерікті тұрғындар белсене араласты. Сенбілік аясында жалпы ұзындығы 12 шақырым болатын аумақ қоқыстан тазартылды. Қалдықтарды арнайы орынға жеткізу үшін 6 техника жұмылдырылды.
Іс-шара барысында демалыс аймағы мен өзен жағалауы, жол жиегі түгелдей тазартылып, экологиялық ахуалды жақсартуға бағытталған жұмыстар жүргізілді. Тұрғындарға қоршаған ортаны күтіп ұстаудың маңызы түсіндірілді.
Сенбілікте сөз алған аудан әкімі мен Арман Оспанов табиғат — баршаға ортақ байлық екенін атап өтіп, әрбір азаматты экологиялық мәдениетті арттыруға, туған жердің тазалығына бей-жай қарамауға шақырды.
Аталған шаралар Түркістан облысы әкімінің тапсырмасына сәйкес өңірдегі экологиялық жағдайды жақсартуға бағытталған жүйелі жұмыстардың бір бөлігі болып табылады. Мұндай сенбіліктер алдағы уақытта да жалғасын табады.
