8 қазанда Мәскеуде ТМД мемлекет басшылары кеңесінің шағын құрамдағы отырысы өтті. Жиын барысында президент Тоқаев сөз сөйледі.
Тоқаев ТМД президенттерімен кездесуінде «мемлекет басшылары деңгейіндегі қоғамдық сыни шабуылдардан аулақ болуға» шақырды.
“Өткен ғасырдың 90-жылдарында Балқан түбегіндегі секілді күрделі жағдайларға посткеңестік аумақта жол берілген жоқ. Мұнда Тәуелсіз Мемлекеттер Достастығының үлесі зор деуге болады. Сондықтан Достастықты сақтау керек деп ойлаймын. Осы мақсатта өзара сенімді нығайтудың ең тиімді шараларын қабылдап, мемлекеттер басшылары деңгейінде бір-бірімізді негізсіз сынап-мінеуден аулақ болып, ұстамдылық пен парасаттылық танытқанымыз жөн», – деді Тоқаев.
Президент геосаяси тұрақсыздық пен аумалы-төкпелі халықаралық ахуал жағдайында өтіп жатқан кездесу Ұйым жұмысына тың серпін беруге тиіс екенін айтты.
«Біздің ел Әзербайжан мен Арменияның бейбіт келісім жасауға деген ұмтылыстарын құптайды. Сонымен қатар Орталық Азия аймағындағы мемлекетаралық шекаралардың жекелеген бөліктерін заңдық тұрғыдан ресімдеуді аяқтау ісінде айтарлықтай ілгерілеу бар», – деді ҺТоқаев.
Президент ТМД жаһандық ынтымақтастық пен даму үдерісіне елеулі үлес қосып келе жатқан тиімді өңірлік ұйым ретінде халықаралық деңгейде кеңінен мойындалғанына тоқталды.
«Достастық БҰҰ-ның түрлі құрылымымен, сондай-ақ басқа да көптеген халықаралық және өңірлік ұйыммен ұтымды байланыс орнатты. ТМД-ның әлемдік аренадағы беделі артып келеді. Былтыр ТМД жанындағы Бақылаушы және Серіктес мәртебесі бекітілді. Бұл шешім Ұйымның кемеліне келгенін және ашықтығын көрсетеді. Осы жүйелі жұмысты жалғастырып, «ТМД +» форматын құру туралы мәселені қарастыруды ұсынамын. Мұндай алаң Достастықтың өңірлік байланыстарын кеңейтуге негіз болады», – деді президент.
Президенттің сынап-мінеуден аулақ болайық деген сөзі Беларусь президенті Александр Лукашенкоға бағытталған болуы мүмкін. Себебі жазда Беларусь басшысы кейбір посткеңестік елдер Ресейден бірдеңе алғылары келеді, дегенмен “ештеңе беруге дайын емес” деп мәлімдеген еді.
«Астана Қытайға, Үндістанға немесе Пәкістанға емес, Мәскеу мен Минскке бұрылды да: «Путин, Лукашенко көмектес” деп айтты», – деген еді Лукашенко.
Айта кетейік, бұған дейін ТМД елдері Ұлы Отан соғысындағы Жеңістің 80 жылдығын бірлесіп атап өтетінін айтқан еді.
