Астана, Қазақстан (20 қараша 2024) — Қазақстан Президенті Қасым-Жомарт Тоқаевтың бастамасымен орыс тілі жөніндегі халықаралық ұйым құру туралы келісімді ратификациялау туралы заң жобасы Мәжілістің қарауына келіп түсті. Бұл туралы халықаралық істер, қорғаныс және қауіпсіздік комитетінің төрайымы Айгүл Құспан мәлімдеді.
Фото коллаж kursiv.media
Аталған келісім 2023 жылдың 13 қазанында Бішкек қаласында жасалған. Ол халықаралық құқық субъектісі мәртебесіне ие болатын үкіметаралық ұйым — орыс тілі жөніндегі халықаралық ұйым құруды көздейді.
Айгүл Құспанның атап өтуінше, орыс тілі ағылшын, араб, испан, қытай және француз тілдерімен қатар БҰҰ-ның ресми тілі мәртебесіне ие.
Келісімнің мақсаты — ұйымға мүше мемлекеттер арасындағы достықты, тату көршілікті, өзара түсіністікті және өзара тиімді ынтымақтастықты нығайту.
Еске сала кетейік, 2022 жылдың қазанында Тоқаев ТМД елдерінің эгидасымен орыс тілін қолдау және дамыту жөніндегі ұйым құруды ұсынған болатын.
