18 қазан күні АҚШ-тың барлық 50 штатында және Еуропаның бірнеше елінде Дональд Трамптың саясатына қарсы «No Kings» ұранымен жаппай наразылықтар өтті, деп хабарлайды Todayinfo DW басылымына сілтеме жасап.
Ұйымдастырушылардың дерегінше, акциялар АҚШ-тың 2700-ге жуық қаласы мен елді мекенінде өтіп, оған шамамен жеті миллион адам қатысқан. Наразылықтар Вашингтон, Нью-Йорк, Лос-Анджелес, Чикаго, Атланта және басқа да ірі қалаларды қамтыды.
Қатысушылар қолдарына «Патшаларға жол жоқ», «Миллиардерлер АҚШ-ты құрдымға жібереді», «монархияға жол жоқ» деген жазулары бар плакаттар ұстап шыққан.
Акциялар 1 қазаннан бері жалғасып келе жатқан АҚШ үкіметі жұмысының тоқтап қалуы кезінде ұйымдастырылды. Бұл үшін Демократиялық және Республикалық партия өкілдері бір-бірін айыптап отыр. Наразылар президенттің «авторитарлық билік орнатуға талпынысына» және көші-қон саясатына да қарсы шыққан.
Еуропада да «No Kings» қозғалысына қолдау көрсетілді. Наразылық акциялары Германия, Ұлыбритания, Франция, Испания, Италия және басқа елдерде өтті. Euronews дерегінше, шеруге негізінен шетелде тұратын америкалықтар қатысқан.
Наразылықтар күні Дональд Трамп Флоридада гольф ойнап жүрген. Fox телеарнасына берген сұхбатында ол өзіне бағытталған сынға:
«Кейбіреулер үкімет жұмысын әдейі тоқтатып жатыр дейді. Мен патша емеспін ғой, бірақ олар мені солай атайды. Мен патша емеспін», — деп жауап берген.
Бұған дейін де «No Kings» қозғалысының акциялары 14 маусымда, Трамптың туған күнінде өткен болатын. Ол кезде де АҚШ-тың бірнеше қаласында миллиондаған адам көшеге шыққан еді.
Фото:FREDERIC J. BROWN/AFP via Getty Images
