Биыл барша халқымыз үшін аса қастерлі дата Ұлы Жеңістің 80 жылдығы атап өтілуде. Батыр бабалардың рухына тағзым етіп, тылда ерен еңбек еткен аталарға құрмет көрсететін осы мерекеде Түркістан қаласының әкімі Әзімбек Пазылбекұлы ардагерлердің үйіне арнайы барды, деп хабарлайды Todayinfo ақпараттық агенттігі.
Әзімбек Пазылбекұлы Ұлы Жеңіс жолында тылда тынымсыз еңбек еткен ардагерлер Елтай Бимаханбетұлы, Иреспек Хаджиддинов және Карима Нурмухамедовамен кездесіп, оларға шынайы құрмет пен алғысын білдірді.
Кездесу барысында Мемлекет басшысы Қасым-Жомарт Кемелұлы Тоқаевтың Жеңіс күніне орай жолдаған арнайы құттықтау хаты мен «Ұлы Жеңіске 80 жыл» мерекелік медалі салтанатты түрде табысталды. Бұл – халқымыздың, мемлекетіміздің және келер ұрпақтың атынан білдірілген зор алғыс пен мәңгілік құрметтің белгісі.
«Бүгінгі бейбіт күннің, ашық аспанның, тыныш өмірдің бағасын білу үшін біз кешегі тарихымызға терең үңілуіміз қажет. Ардагерлеріміздің жанқиярлық еңбегі, қайсар рухы бүгінгі ұрпақ үшін өшпес өнеге», – деді әкім.
Тыл ардагерлері Жеңіс жолында майданды азық-түлікпен, киім-кешекпен, құрал-жабдықпен қамтамасыз етіп, ерен еңбек атқарды. Аш-жалаңаш жүрсе де рухы сынбаған, керісінше Отанға деген сүйіспеншілігін еңбегімен дәлелдеген бұл азаматтарымыз – шын мәнінде есімдері ел тарихында алтын әріппен жазылатын тұлғалар.
Әкім ардагерлерге қала атынан естелік сый-сияпаттар табыстап, ұзақ ғұмыр мен амандық тіледі. Олардың ақ батасын алу — бүгінгі буын үшін үлкен мәртебе екенін атап өтті.
Қазіргі таңда Түркістан қаласында 255 тыл ардагері мен 9 Ұлы Отан соғысы мүгедегінің жұбайларына біржолғы әлеуметтік көмек көрсетілді. Бұл — ел үшін жанын салған жандарға көрсетілетін шынайы қамқорлықтың көрінісі.
Тарихи мәліметтерге сүйенсек, Түркістан қаласынан майданға 20 мыңнан астам азамат аттанған. Олардың 12 мыңнан астамы елге оралып, бейбіт өмірді қалпына келтіруге зор үлес қосты. Ал 7 түркістандыққа Совет Одағының Батыры атағы берілді. Бұл – Түркістан жұртының ел үшін жасаған ерен еңбегінің айқын айғағы.
Әзімбек Пазылбекұлы өз сөзінде:
«Ардагерлеріміздің ерлігі — ұлттың рухани тірегі. Бұл ерлік ұмытылмауы керек, жас ұрпақтың санасында сақталып, келешекке өнеге болуы тиіс. Ұлы Жеңіс – өткеннің ғана емес, бүгін мен болашақтың да қасиетті мұрасы», – деп атап өтті.
Түркістанда өткен бұл тағылымды кездесу ерлікке тағзым, ұрпаққа өнеге, елдікке қызмет етудің жарқын үлгісі болды.
