Түркістан облысы әкімінің орынбасары Нұрбол Тұрашбеков Бұқаралық ақпарат құралдары қызметкерлерінің күніне орай журналистер қауымын құттықтады, деп хабарлайды Todayinfo ақпараттық агенттігі.
Ол журналистік мамандықтың қоғам үшін маңызы зор екенін атап өтіп, БАҚ өкілдеріне шынайы ризашылығын білдірді.
«Сөз қадірін “өз қадірім” деп білетін, ақпарат майданында әділдік пен адалдық үшін қаламын қару ететін, елдің жоғын түгендеп, мұңын шағатын, жақсысын асырып, жаманын түзеуге атсалысатын мамандық иелері – Құрметті журналистер қауымы! Сіздерді бүгінгі кәсіби мерекелеріңізбен шын жүректен құттықтаймын!» – делінген құттықтау хатында.
Нұрбол Тұрашбеков бұқаралық ақпарат құралдарын қоғамның айнасы деп сипаттап, дәстүрлі медианың маңызын ерекше атап өтті.
«Әлем әлеуметтік желіге байланса да, отбасымда негізгі ақпаратты баспасөзден іздеу, телеарнадан қарау, радиохабар тыңдау әдеті қалыптасқан. Өйткені дәстүрлі БАҚ – талай дәуірдің сынынан сүрінбей өтіп, заман көшіне бейімделіп келе жатқан үлкен күш», – деді облыс әкімінің орынбасары.
Ол өз сөзінде ақпарат саласында адал еңбек етіп жүрген барлық журналистерге шығармашылық табыс пен береке тілеп, еліміздің мерейін өсіретін жақсы жаңалықтар көп болсын деген ниет білдірді.
Айта кетейік, 28 маусым — Бұқаралық ақпарат құралдары қызметкерлерінің кәсіби мерекесі.
