Түркістан облысынан Ақтөбе және Батыс Қазақстан облыстарына 371 тонна гуманитарлық көмек жіберілді., деп хабарлайды Todayinfo агенттігі.
Бұл туралы Түркістан облысы қоғамдық даму басқармасының «Жастар ресурстық орталығы» КММ басшысы Ернар Бектаев айтып берді.
«Ақтөбе және Батыс Қазақстан облыстарына жалпы көлемі 371 тонна гуманитарлық көмек жіберілді, оның ішінде гигиеналық заттар, азық-түлік, балалардың киімдері мен ойыншықтар бар. Ал бүгін су басқан аймақтарға 150 тоннадан астам гуманитарлық көмек жөнелтіледі. Сондай-ақ 50 волонтер көмектесу үшін су басқан аймақтарға аттанады», — деді Ернар Бектаев Орталық коммуникациялар қызметінде.
Су тасқыны басталғалы Түркістан облысында 18 штаб құрылды. Қазіргі уақытта зардап шеккен аймақтарға 12 фура жүк жөнелтілген. Спикердің айтуынша, облыстағы түрік этно-мәдени орталығы мен өзбек этно-мәдени орталығы да гуманитарлық көмек жіберуге атсалысқан.
