Түркістан облысында интернетпен қамтуға қатысты мәселелерді шешу мақсатында 372 ауылдық елді мекенде ауқымды жұмыстар жүргізілмек. Бұл туралы Түркістан облысының әкімі Нұралхан Көшеров пен «Қазақтелеком» АҚ басқарма төрағасы Бағдат Мусиннің кездесуінде мәлім болды, деп хабарлайды Todayinfo ақпараттық агенттігі.
Кездесу барысында облыс әкімі өңірдің цифрландыру саласындағы жұмыстарын атап өтіп, интернет жүйелерін дамытуға қолдау көрсетілетінін жеткізді. Оның айтуынша, Түркістан облысында 801 ауылдық елді мекеннің 740-ы мобильді интернет желісімен қамтылған, ал 429-ы оптика желісіне қосылған. Дегенмен, 372 ауылда оптика желісінің болмауы айтарлықтай мәселе болып отыр.
– Мемлекет басшысы интернетке қолжетімділікті адамның негізгі қажеттіліктерінің бірі ретінде атап өткен. Сондықтан өңірімізде бұл бағыттағы жұмыстарға ерекше көңіл бөлінуде. «Қазақтелеком» АҚ тарапынан бөлініп отырған қаржы – Түркістан облысы үшін маңызды инвестиция. Біз, өз кезегімізде, байланыс операторларын қажетті инфрақұрылыммен қамтамасыз етуге ықпал етеміз, – деді Нұралхан Көшеров.
Бағдат Мусин Түркістан облысындағы халық санының көптігі мен ауылдардың тығыз орналасуына байланысты интернет инфрақұрылымын дамыту ерекше назарда екенін айтты. «Қазақтелеком» АҚ 372 ауылдық елді мекеннің телекоммуникация жүйесін жақсарту үшін 14,7 млрд теңге көлемінде инвестиция салатынын мәлімдеді.
Кездесуде екі тарап алдағы жобаларды сапалы әрі уақытылы орындау үшін бірлескен жұмыстар жүргізу қажеттілігін талқылады. Жиын соңында Нұралхан Көшеров пен Бағдат Мусин интернет инфрақұрылымын дамыту бойынша меморандумға қол қойды.
Бұл бастама жүзеге асқан жағдайда, өңірдегі ауыл тұрғындары сапалы интернетке қол жеткізу мүмкіндігіне ие болады. Жоба Түркістан облысының цифрландыру саласындағы басты қадамдарының бірі болмақ.
