Өңірде интернет-алаяқтарға қарсы «CyberPol» соққы-нысаналы тобы жұмыс істеп жатыр. Бұл туралы Түркістан облысы полиция департаментінің криминалдық полиция басқармасы бастығының орынбасары Ердәулет Амантаев мәлімдеді, деп хабарлайды Todayinfo.
Статистикалық мәліметтерге сүйенсек, өткен жылы облыс аумағында интернет-алаяқтық бойынша 567 іс тіркелген. Бұл көрсеткішті 2022 жылмен салыстыратын болсақ, аталған қылмыс түрінің 43 жайтқа көбейгенін көреміз. Ал, сотқа 219 іс жолданған.
Қазіргі кезде өңірде интернет-алаяқтық қылмыстарына қарсы күресті оңтайландыру мақсатында «CyberPol» соққы-нысаналы тобы жұмыс істеп жатыр. Оның құрамында 6 жедел уәкіл, 3 тергеуші, 1 криминалист және 1 ІТ-маманы бар.
«CyberPol» соққы-нысаналы тобы қызметкерлерімен жүргізілген жүйелі іс-шаралардың нәтижесінде 67 қылмыскер құрықталып, олардың 113-інің интернет-алаяқтық қылмыстарына қатыстылығы дәлелденді. Мәселен, Өзбекстан Республикасының шекарасында 2003 жылы туған Атырау қаласының тұрғыны ұсталды. Ол арзан бағада жиһаз жасайтынын айтып, әлеуметтік желілерден ашқан жалған аккаунттардан жарнама берген. Содан жәбірленушілерден ақша алып отырған. Нәтижесінде 5 млн. теңгеден астам шығын келтірілген. Қазіргі таңда күдіктіге қатысты іс сотқа жолданды», — деді Ердәулет Амантаев.
Дереккөз: ҚазАқпарат
Todayinfo.kz
