Түркістан облысында нашақорлықтың алдын алу және есірткі бизнесіне қарсы іс-қимыл бағытындағы жұмыстар қарқын алып келеді. ҚР Ішкі істер министрлігінің делегациясы өңірге жұмыс сапарымен келіп, Түркістан қаласында осы мәселеге арналған кеңес отырысын өткізді, деп хабарлайды Todayinfo ақпараттық агенттігі.
Жиын Түркістан облысы әкімінің орынбасары Бейсенбай Тәжібаевтың төрағалығымен өтті. Онда нашақорлық пен есірткі қылмысына қарсы күрес шараларының тиімділігі сараланып, алдағы кезеңге арналған міндеттер талқыланды.
Кеңес барысында ҚР Ішкі істер министрінің бірінші орынбасары Бауыржан Әленов, министрлік өкілдері Жанос Ақтаев пен Баян Ахатай атқарылған жұмыстарға оң бағасын беріп, профилактикалық жұмыстарды күшейту жөнінде нақты ұсыныстарын жеткізді.
Бейсенбай Тәжібаев жауапты тұлғаларға нәтижесіз жобаларды қысқартуды, сондай-ақ нашақорлықты жеңіп шыққан азаматтармен мотивациялық кездесулер ұйымдастыруды тапсырды. NEET санатындағы жастарға, ҰБТ тапсырмаған түлектерге арналған білім беру гранттары, «Жастар практикасы» секілді мемлекеттік бағдарламалардың мүмкіндіктерін түсіндіру жұмыстарын күшейту керектігі айтылды.
Кеңес отырысында Түркістан облысы Полиция департаменті бастығының міндетін атқарушы, полиция полковнигі Құрманбек Сахов 2025 жылдың 4 айындағы жұмыс нәтижелері туралы есеп берді. Оның айтуынша, биылғы төрт айда өңірде есірткіге қатысты 139 құқық бұзушылық тіркелген. Оның 33-і — қылмыс, 106-сы — теріс қылық ретінде анықталған. Заңсыз айналымнан 198 кг 527,60 грамм есірткі тәркіленді. Оның құрамында синтетикалық есірткілермен қатар гашиш, марихуана, көкнәр сабаны және кокаин де болған.
2025 жыл – Профилактика жылы деп жарияланған. Осыған орай облыста құқықтық сауаттылықты арттыру, заң мен тәртіпті сақтау және салауатты өмір салтын насихаттау бағытындағы іс-шаралар күшейтілуде. Бұл жұмыстарды үйлестіру үшін облыстық Полиция департаменті жанынан арнайы Кеңес құрылып, ведомствоаралық өзара іс-қимыл жолға қойылды.
Интернет арқылы таралатын синтетикалық есірткілерге тосқауыл қою мақсатында тұрақты мониторинг жүргізілуде. Жыл басынан бері 405 сайт анықталып, «Киберқадағалау» сараптамасы арқылы бұғатталған. Сонымен қатар ойын-сауық орындарында 48 рейд, әуежайлар мен вокзалдарда есірткі тасымалына қарсы 50-ден аса жедел іс-шара өткізілді.
Наурыз айында өткізілген «Дәрмек» жедел-профилактикалық шарасы барысында облыс аумағындағы 105 дәріхана, 4 қойма, 16 емдеу мекемесі және 3 өндірістік кәсіпорын тексеріліп, 42 әкімшілік құқық бұзушылық анықталды.
Кеңес барысында Облыстық қоғамдық даму және Денсаулық сақтау басқармаларының есебі тыңдалып, нашақорлықпен күресте ведомстволық және қоғамдық күштерді біріктіру қажеттігі атап өтілді.
