Түркістан облысы әкімінің орынбасары Нұрбол Тұрашбеков табиғи ресурстар және табиғат пайдалануды реттеу басқармасына қарасты мекемелердің өзекті мәселелерін талқылау бойынша жиналыс өткізді. Жиында Сырдария-Түркістан мемлекеттік өңірлік табиғи паркінің, Қазығұрт ауданындағы «Жасыл желек» мекемесінің және Шардара ауданындағы «Орман және жануарлар әлемін қорғау» мекемесінің басшылары есеп берді, деп хабарлайды Todayinfo ақпараттық агенттігі.
Сырдария-Түркістан мемлекеттік өңірлік табиғи паркінің басшысы Ақыл Әбдіқадыровтың мәліметінше, мекеме қарауында 119 949 гектар жер бар, оның 63 569 гектары орманды алқап. Орман шаруашылығын дамыту үш бөлімше арқылы жүзеге асырылуда. Қазіргі теңгерімдегі техника саны 50 бірлікті құрайды, бірақ өрт сөндіруге арналған екі көлік жаңартуды қажет етеді. Жыл басынан бері 148 рейд ұйымдастырылып, 104 заң бұзушылық анықталған. Мекеме техника мен арнайы құрылғыларды жаңарту, сондай-ақ көшеттерді күтіп-баптау үшін қолдау қажет екенін жеткізді.
Қазығұрттағы «Жасыл желек» мекемесі үш алқапта көшет өсіру жұмыстарын жүргізуде. Өткен жылы 950 мың көшет таратылса, биыл көктемде бұл көрсеткіш 180 мыңды құрады. Жыл басынан бері су жүйесі ретке келтіріліп, игерілмей келген 14 гектар жер айналымға қосылған. Мекеме басшысы жұмыс күшін арттыру үшін қосымша штат бөлуді және кеңсе ғимаратын салу қажеттігін атап өтті.
Шардара орман және жануарлар әлемін қорғау мекемесінің басшысы Дулат Сартбаевтың айтуынша, соңғы үш жылда мекемедегі тұқымбақтардан Түркістандағы жасыл белдеуге, Мақтаарал, Жетісай және Шардара аудандарына 620 мыңнан астам көшет жөнелтілген. Тұқымбақ аумағының кеңеюіне байланысты мұнда да жұмыс күшінің жетіспеушілігі байқалады.
Нұрбол Тұрашбеков көшет өсіру және аудандарға жеткізу кезінде олардың жерсінуін басты назарға алу керектігін айтты. Ол аудан-қалаларға көшет ұсыну барысында ауа райы мен топырақ ерекшеліктерінің ескерілмеуіне назар аударды.
Кездесу қорытындысы бойынша табиғи ресурстар және табиғат пайдалануды реттеу басқармасына нақты тапсырмалар беріліп, оларды орындау мерзімі белгіленді. Жауапты тұлғалар бекітіліп, мекемелердің кемшіліктерін жою бойынша жұмыстар ұйымдастырылатыны айтылды.
