Түркістан қаласының әкімі Әзімбек Пазылбекұлының төрағалығымен жұмыспен қамту мәселелеріне арналған кеңейтілген жиын өтті. Жиынға қала әкімдігі, мемлекеттік мекемелер, жұмыспен қамту саласының өкілдері мен әлеуметтік сала мамандары қатысты, деп хабарлайды Todayinfo ақпараттық агенттігі.
Кездесу барысында Түркістан қалалық Мансап орталығының 2025 жылға арналған жұмыс жоспарлары мен ағымдағы жылдың басынан бері атқарылған шаралары таныстырылды. Биыл Мансап орталығы субсидияланған жұмыс орындары бойынша 2835 адамды жұмыспен қамтуды жоспарлап отыр. Оның ішінде:
қоғамдық жұмыстарға – 1112 адам,
жастар практикасына – 1182 адам,
«Күміс жас» жобасына – 253 адам,
әлеуметтік жұмыс орындарына – 287 адам,
арнайы жұмыс орнына – 1 адам,
тұрақты жұмысқа – 4678 адам,
«10 мың тұрғынға – 100 жаңа жұмыс орны» бағдарламасы аясында – 2220 адам тарту көзделген.
Жиында сонымен қатар «Ұлттық жоба» өңірлік картасы шеңберінде Түркістан қаласы бойынша 30 жоба аясында 335 жаңа жұмыс орны ашылатыны атап өтілді. Бұған қоса, мүмкіндігі шектеулі азаматтарға арналған 29 квотаның 11-і орындалғаны, ал пробация есебінде тұрған және әлеуметтік осал топтарға арнайы жұмыс орындарының қарастырылғаны мәлімделді.
Сондай-ақ, Түркістан облысының Жұмыспен қамтуды үйлестіру және әлеуметтік бағдарламалар басқармасына қарасты «Еңбек мобильділігі орталығы» КММ тарапынан 2025 жылға Түркістан қаласы бойынша 11096 адамды жұмыспен қамту жоспары бекітілген. Бұл межені жыл соңына дейін толық орындау көзделіп отыр.
Жиын соңында қала әкімі жауапты сала басшыларына нақты тапсырмалар беріп, халықты жұмыспен қамту бағытындағы жұмыстарды күшейту қажеттігін баса айтты. Сонымен қатар, жұмыс сапасын арттыру, бос жұмыс орындарын дер кезінде ұсыну және халықты ақпараттандыру жұмыстарын жетілдіру міндеттелді.
