Түркістан облысының әкімі Нұралхан Көшеров «China Railway Asia-Europe Construction Investment Co., Ltd.» компаниясының бас директоры Чжоу Хайвэймен ресми кездесу өткізіп, екіжақты ынтымақтастық мәселелерін талқылады. Бұған дейін Астанадағы жеңіл рельсті көлік (LRT) жобасына қатысқан аталмыш қытайлық компания енді Түркістан өңірінде де ауқымды инфрақұрылымдық және инвестициялық жобаларды жүзеге асыруға мүдделі екенін білдірді.
Кездесу барысында тараптар Түркістан облысында бірлесіп іске асырылатын жобалар тізбегін қарастырып, алғашқы нақты қадам ретінде Түркістан қаласының шығыс айналма жолының құрылысын бастауды келісіп бекітті. Аталған жоба биылғы жылдың қыркүйек айында іске қосылып, өңір үшін маңызды көлік-логистикалық нысанға айналуы көзделіп отыр.
– Екі ел Президенттері арасындағы достық пен стратегиялық әріптестік түрлі салаларда ірі бастамалардың жүзеге асуына жол ашып отыр. Бір ай бұрын Сізбен болған алғашқы кездесуімізде Түркістан өңірінде бірнеше жобаны іске асыруға келіскен болатынбыз. Енді міне, сол уағдаластық нақты қадамдарға ұласып отыр. Бұл — Түркістан облысының экономикалық дамуына тың серпін беретініне сенімдімін, – деді облыс әкімі Нұралхан Көшеров.
Инвестор тарапынан қолға алынатын басты жобалардың бірі — Түркістан қаласының шығыс айналма жолының құрылысы. Қазіргі таңда халықаралық маңызы бар «Батыс Еуропа – Батыс Қытай» транзиттік дәлізі Түркістан қаласының орталық бөлігінен өтуде. Бұл жағдай күн сайын шамамен 8000-ға жуық ірі жүк көлігінің қала орталығымен жүруіне себеп болып отыр. Салдарынан қала көшелерінде көлік кептелісі жиілеп, жолдардың тез тозуына әкелуде. Сонымен қатар, жүк тасымалдаушылар үшін де қаланың ішкі жолдарымен жүру тиімсіз әрі қолайсыз.
Осы мәселені түбегейлі шешу үшін Түркістан қаласының шығыс бөлігінен ұзындығы шамамен 30 шақырым болатын жаңа айналма жол салу жоспары мақұлданды. Бұл жоба толықтай іске қосылған жағдайда қала орталығындағы көлік ағыны азайып, жол қауіпсіздігі мен тұрғындардың жайлылығы артады. Құрылыс мерзімі 1,5 жыл деп жоспарланып отыр.
Кездесу барысында тараптар тек жол құрылысы ғана емес, сонымен қатар өңірде заманауи логистикалық орталық пен өндірістік кәсіпорындар ашу бойынша да келіссөз жүргізді. Жобалардың жүзеге асырылуы аймақтың инвестициялық тартымдылығын арттырып, жаңа жұмыс орындарын ашуға мүмкіндік береді. Қытайлық серіктестер Түркістан облысының логистика, көлік, құрылыс және өндіріс салаларындағы мүмкіндіктерін жоғары бағалап отыр.
Келешекте қолға алынатын әріптестік жобалар Түркістан өңірінің әлеуметтік-экономикалық дамуына оң әсерін тигізіп, халықаралық ынтымақтастықтың жарқын үлгісіне айналады деп күтілуде.
