Түркістан облысында электр энергиясы тапшылығын жоюдың жолдары шешіліп жатыр. Төле би ауданында шағын су электр станциясы салынбақ, деп хабарлайды Todayinfo.kz ақпараттық агенттігі.
Ауданда бұқаралық ақпарат құралдарына өкілдеріне арналған баспасөз туры өтті. Тур аясында журналистер алдымен Қаратөбе ауылдық округіндегі шағын су электр станциясының құрылыс жұмыстарымен танысты. Жеке инвестор «Тау Энерго» ЖШС тарапынан салынып жатқан станцияның қуаттылығы сағатына 3,2 МВТ құрайды. Бұдан бөлек, журналистер Жоғарғы Ақсу ауылдық округінде салынып жатқан «Жасыл қуат» ЖШС-ң шағын су электр станциясына барды.
«Станцияның қуаттылығы сағатына — 2 МВТ. Аталған нысандар 2025 жылы қолданысқа беріледі деп жоспарланған. Инвестициялық жобалар жүзеге асқан жағдайда тұрғындар үшін тұтынатын электр жарығының бағасы «Оңтүстік Жарық» мекемесі ұсынып отырған тарифтен төмен болмақ. Сондай-ақ, екі станцияда 10 бірліктен жұмыс орындары ашылып, ауыл тұрғындары тұрақты жұмыспен қамтылмақ», -деп хабарлады Түркістан облысы әкімдігінің баспасөз қызметі.
БАҚ өкілдері кейін Қаратөбе ауылдық округіндегі Балдыберек өзені арқылы өтетін пайдалануға берілген көпірдің жай-күйімен танысты. Осы уақытқа дейін ауыл тұрғындары өзеннің тасуы кезінде біршама қиындықтарға тап болған. Халықтың сұранысымен көпірдің құрылыс жұмыстары басталып, биыл ел игілігіне тапсырылып отыр.
«Құрылыс жұмыстарын жүргізген мердігер мекеме — «ABC Group KZ» ЖШС. Тур аясында Қаратөбе ауылдық округіндегі Қостөбе жалпы орта мектебінің құрылыс жұмыстары таныстырылды. 2024 жылдың ақпан айынан бастап мердігер мекеме «Радуга-СН» ЖШС тарапынан ғимаратқа күрделі жөндеу жұмыстары жүргізілген. Бүгінде 150 орындықты мектептің есік-терезелері, жылу құбыры, едені және шатырына дейін толық жаңартылған», -деді аудандық әкімдіктің өкілдері.
