Бүгін Түркістан қаласындағы Бекзат Саттарханов атындағы заманауи спорт кешенінде ұлттық ойын түрі – асық ату спортынан 2015-2017 жылы туған ұлдар мен қыздар арасында Қазақстан Республикасының чемпионаты өз жалауын көтерді. Жас өрендер арасында өткізілетін бұл республикалық біріншілікке еліміздің 16 облысынан және ірі қалаларынан 100-ге жуық талантты жас спортшы жиналды. Олар ұлттық рух пен намысты ту етіп, спорттық шеберліктерін паш ету үшін Түркістан төрінде бас қосты.
Чемпионаттың салтанатты ашылу рәсімі ерекше рухты, патриоттық сипатта өтті. Ашылу салтанатында Түркістан облыстық дене шынықтыру және спорт басқармасының басшысы Ғалымжан Худияров сөз сөйлеп, қатысушыларға ізгі тілегін білдіріп, бұл дода — ел болашағы саналатын жас ұрпақтың бойында ұлттық ойындарға деген сүйіспеншілікті арттыруда үлкен маңызға ие екенін атап өтті. Сонымен қатар, асық ату спортынан Қазақстан Республикасының мемлекеттік жаттықтырушысы Жомарт Оразов та жас спортшыларға сәттілік тілеп, ұлттық мұраны заманауи спорттық форматта жалғастырудың маңыздылығына тоқталды.
Асық ату – ата-бабадан қалған дәстүрлі мұра, ұлттың төл ойыны. Бүгінгі таңда бұл спорт түрі қайта жаңғырып, елімізде жүйелі түрде дамытылып келеді. Чемпионаттың басты мақсаты – ұлттық спорт түрін насихаттау, жас жеткіншектер арасында асық атуға деген қызығушылықты арттыру және олардың шеберлігін бағамдау. Сондай-ақ, мұндай додалар әр өңірдегі ұлттық спорттың даму деңгейін саралауға да үлкен мүмкіндік береді.
Жарыс барысында әр өңірден келген командалар ұлттық намыс жолында бар шеберліктерін салып, тартысты ойын өрнегін көрсетуде. Әсіресе, Түркістан облысының командасы жоғары дайындық деңгейін байқатып, басты жүлдеден дәмелі екендерін анық аңғартуда. Өз алаңында өткізіліп жатқан бұл чемпионат олар үшін үлкен мүмкіндік және үлкен жауапкершілік.
Айта кету керек, қазіргі уақытта асық ату спортын халықаралық деңгейге шығару бойынша нақты жұмыстар атқарылуда. Атап айтқанда, Қазақстан тарапы бұл ұлттық ойынды Азия балалары ойындарының ресми бағдарламасына енгізу бастамасын көтеріп отыр. Бұл бағыттағы ұсыныстар қолдау тауып, қажетті құжаттар мен ережелер әзірленуде. Егер бастама сәтті жүзеге асса, асық ату болашақта Азия кеңістігінде танымал спорт түрлерінің қатарына енуі әбден мүмкін. Бұл – тек спорттық жетістік емес, сонымен бірге қазақ халқының мәдени мұрасын әлемге танытудың жарқын жолы болмақ.
Чемпионат бірнеше күнге созылып, жас спортшылар бір-бірімен шеберлік пен ептілікте бақ сынасады. Жарыс соңында жеңімпаздар мен жүлдегерлер арнайы кубоктармен, медальдармен және дипломдармен марапатталатын болады.
Бұл — тек бір чемпионат емес, бұл — ұлттық құндылықты ұлықтаудың жарқын көрінісі. Түркістан төрінде бастау алған бұл жарыс ұлттық спорт тарихындағы маңызды белестердің бірі болып қалары сөзсіз.
