Бүгін жаңа оқу жылы қарсаңында қала әкімі Әзімбек Пазылбекұлы ұстаздармен кездесіп, дәстүрлі Тамыз конференциясына қатысты, деп хабарлайды Todayinfo ақпараттық агенттігі.
Түркістан қаласында 85 мектепте 55 мыңнан астам оқушы білім алып, 150 балабақшада 17 мыңнан астам бүлдіршін тәрбиеленуде.
Сондай-ақ, биылғы жылы 178 оқушы «Алтын белгіге», 250 оқушы «Үздік аттестатқа» ие болып, түлектердің 80 пайыздан астамы мемлекеттік гранттармен оқуға түсті.
Осы ретте Әзімбек Пазылбекұлы ұстаздар қауымын жаңа оқу жылымен құттықтап, білім саласындағы жетістіктер мен алдағы міндеттерге тоқталды.
— Өткен оқу жылында қаламызда төрт жаңа мектеп пайдалануға беріліп, үш «Жайлы мектеп» және №35 мектеп іске қосылды. Сонымен қатар, білім сапасы бойынша жоғары көрсеткіштерге қол жеткізді. Оқушыларымыз республикалық, халықаралық олимпиада мен байқаулардан жүлделі орындармен оралды. Тағы бір жақсы жаңалығымыз, биыл екі бірдей мекеме – Өнер мектебі мен Балалар-жасөспірімдер орталығы жаңа ғимаратқа көшірілетін болады, — деп атап өтті қала басшысы.
Сондай-ақ, Әзімбек Пазылбекұлы өз сөзінде білім саласын дамыту мақсатында үш жылдық стратегиялық жоспар әзірлеп, ұлттық құндылықтарды дәріптеудің маңыздылығын атап, мектептерде «Ясауитану» пәнін енгізуді ұсынды.
Жиын соңында қала әкімі білім саласының дамуына үлес қосқан ұстаздар қауымына алғысын білдіріп, арнайы марапаттарын табыстады.
