Түркістан облысында халықаралық талаптарға сай екі ірі спорт нысаны – атшабар кешені мен ескек есу каналы салынып жатыр. Облыс әкімі Нұралхан Көшеров аталған құрылыс алаңдарын аралап, жұмыс барысымен танысты , деп хабарлайды Todayinfo ақпараттық агенттігі.
Жоспар бойынша көпфункционалды атшабар кешені Халықаралық ат спорты федерациясының стандарттарына сай салынуда. Бұл кешенде болашақта конкур, үшсайыс, сондай-ақ ұлттық спорт түрлерінен халықаралық және республикалық жарыстар өткізу жоспарланған. Қазіргі таңда құрылыс алаңында 30-дан астам техника мен 71 құрылысшы еңбек етуде.
Облыс әкімі жұмыс сапары барысында пайдаланылып жатқан құрылыс материалдарының сапасын тексеріп, мердігерлер мен жауапты мекеме басшыларына нақты тапсырмалар берді.
Бұдан кейін әкім ескек есу каналының құрылыс барысын көрді. Аталған нысан академиялық есу, ескек есу, сонымен бірге туризм бағытында спорт пен инфрақұрылымды дамытуға зор үлес қосады. Сонымен қатар кешен Түркістан қаласының суару жүйесіне де оң ықпал етпек.
Құрылыс жұмыстары 2021 жылы басталған нысан үш кезеңнен тұрады. Қазіргі уақытта үшінші кезеңнің жұмыстары қызу жүргізілуде. Құрылыс алаңында 165 адам және 24 арнайы техника жұмылдырылған.
Жобада 1000 орындық трибуна, қайықтар мен спорт жабдықтарына арналған эллинг ғимараты, төрешілер мұнаралары, аэрация және сүзгі жүйелері, инженерлік инфрақұрылым, электрондық табло, сондай-ақ көгалдандыру мен абаттандыру элементтері қарастырылған.
Аталған спорт нысандарының іске қосылуы Түркістан облысындағы спорт инфрақұрылымын халықаралық деңгейге шығаруға және спорт туризмін дамытуға зор серпін береді деп күтілуде.
