Түркістан қаласында 23 маусым – Мемлекеттік қызметшілер күніне арналған салтанатты іс-шара жоғары деңгейде ұйымдастырылып, қызмет бабындағы жауапкершілігімен, адалдығымен ерекшеленетін мемлекеттік қызметшілердің еңбегі кеңінен насихатталды. Бұл – мемлекеттің тірегі саналатын мемлекеттік қызмет жүйесінің маңыздылығын дәріптеп, қоғамға қалтқысыз қызмет етіп жүрген азаматтарға көрсетілген құрметтің айқын көрінісі болды.
Мерекелік жиынға Түркістан облысының әкімі Нұралхан Көшеров арнайы қатысып, жиналғандарды кәсіби мерекелерімен шын жүректен құттықтады. Ол өз сөзінде мемлекеттік қызметтің қоғамдағы орны мен маңыздылығына тоқталып, азаматтардың әл-ауқатын арттыру мен өңірдің өркендеуіне үлес қосып жүрген мемлекеттік қызметшілердің еңбегін ерекше атап өтті.
Салтанатты жиында ел дамуына сүбелі үлес қосқан бірқатар қызметкерлерге лайықты марапаттар табыс етілді. Атап айтқанда, бірқатар үздік мамандар «Мемлекеттік қызмет ардагері» және «Үздік мемлекеттік қызметші» төсбелгілерімен марапатталды. Сонымен қатар, Түркістан облысы әкімінің Құрмет грамотасы мен Алғыс хаттары тапсырылып, олардың адал еңбегі мен кәсіби біліктілігі жоғары бағаланды.
Іс-шараға Түркістан облыстық мәслихатының төрағасы Нұралы Әбішов және ҚР Мемлекеттік қызмет істері агенттігінің Түркістан облысы бойынша департаментінің басшысы Абылайхан Наурызбаев та қатысып, марапат иелерін құттықтап, жылы лебіздерін білдірді. Олар мемлекеттік қызметті дамыту жолында еңбек етіп жүрген мамандардың қоғамдағы жауапты рөлін атап өтіп, адалдық пен кәсібилікті басты ұстаным етуге шақырды.
Мерекелік кеш Түркістан облысының өнер ұжымдары дайындаған мазмұнды концерттік бағдарламамен жалғасты. Көрермендерге әншілердің орындауындағы патриоттық әндер, бишілердің ұлттық нақыштағы би қойылымдары мен күйшілердің шеберлігі ерекше көңіл-күй сыйлады. Бұл кеш – рухани астанада мемлекеттік қызметшілерге арналған мәдени-рухани серпіліс сыйлаған тағылымды басқосу болды.
