Түркістан қаласында тұрғындардан жиі көтерілетін мәселелердің бірі – сапалы және үздіксіз электр энергиясымен қамту. Соңғы уақытта қалада жарықтың жиі сөнуі, трансформаторлардың істен шығуы мен электр желілерінің тозуы сияқты проблемалар байқалып отыр. Бұл туралы қала әкімі Әзімбек Пазылбекұлы арнайы аппараттық жиын барысында мәлімдеді, деп хабарлайды Todayinfo ақпараттық агенттігі.
Ресми мәліметке сәйкес, бүгінде Түркістанда:
- 13 қосалқы станция,
- 1408 шақырымнан астам электр желісі,
- 1669 трансформаторлық қондырғы жұмыс істейді.
Қалада 55 мыңнан астам тұтынушы бар. Оның ішінде 52 мыңы – жеке тұлғалар, 2600-ден астамы – заңды тұлғалар.
Энергетика саласындағы ең өзекті мәселе – желілердің тозуы. Қала әкімінің айтуынша, қазіргі таңда тозу деңгейі 57,3 пайызды құрайды. Бұл назардан тыс қалдыруға болмайтын маңызды көрсеткіш.
«Сала басшыларына қаладағы барлық тозған электр желілері мен трансформаторларды толық түгендеуді, жиі жарық сөніп тұратын аумақтардың техникалық жай-күйін талдауды, ауа райының қолайсыз жағдайларына төтеп бере алатын инженерлік шешімдер қабылдауды тапсырдым», – деді әкім.
Сонымен қатар, апаттық жағдайлар кезінде жедел әрекет ететін бригадалардың дайындығын күшейту, жүктемені тең бөлетін сараптама жасау, жобалық-сметалық құжаттарды әзірлеу секілді нақты тапсырмалар қойылды. Бұл жұмыстар алдағы үш айда жүзеге асырылып, нақты нәтижесін көрсетуі тиіс.
Әзімбек Пазылбекұлы қала тұрғындарының өмір сапасын жақсарту – Түркістанның дамуы жолындағы басты басымдық екенін атап өтті.
«Электр жарығы әр үйдің, әр кәсіпкер мен мекеменің қалыпты жұмысы үшін аса маңызды. Тұрғындар өзін жайлы, қауіпсіз сезінуі керек. Бұл бағыттағы жұмыстар менің жеке бақылауымда болады», – деді әкім.
Халыққа берілген уәдені орындау әкімдік қызметінің басты міндеті екенін айтқан қала басшысы, атқарылып жатқан шаралар туралы тұрақты түрде ақпарат беріліп отыратынын жеткізді.
