2025 жылғы 27 мамыр күні Түркістан қаласының мәдени әрі рухани ордасына айналған «Достық үйінде» маңызды мәдени іс-шара – «Түркістан – бірліктің бастауы» атты фотобайқау өтті. Бұл байқау Қазақстан халқы Ассамблеясының 30 жылдығына орай ұйымдастырылды. Мерейлі дата аясындағы іс-шара ұлттар мен ұлыстар арасындағы ынтымақтастықты дәріптеп, Қазақстандағы бейбіт өмір мен қоғамдық келісімді сурет тілінде бейнелеуді мақсат етті.
Шара Түркістан облыстық қоғамдық даму басқармасы мен оған қарасты «Қоғамдық келісім» КММ-нің қолдауымен жүзеге асты. Байқауға Түркістан облысымен қатар, Алматы қаласынан да фотографтар қатысты. Барлығы 20-ға жуық кәсіби және әуесқой фотограф өз туындыларын ұсынды. Арасында өз жұмыстарын онлайн форматта жіберген қатысушылар да болды.
Іс-шараның салтанатты ашылуында сөз сөйлеген басқарма басшысының орынбасары Нұрсұлтан Сейтжанов қатысушыларға алғыс білдіріп, аталмыш фотобайқаудың мән-маңызын атап өтті. «Бұл тек фото жарыс қана емес, ел ішіндегі татулық пен бірлікті көркем сурет арқылы жеткізудің жарқын үлгісі. Әр сурет – бейбітшілік пен достықтың айнасы», – деді ол.
Байқауға ұсынылған фотосуреттерде еліміздің көпэтносты келбеті, түрлі мәдениет өкілдерінің өзара сыйластығы мен ортақ мүдде төңірегіндегі татулығы көрініс тапты. Қатысушылар объектив арқылы достықты, қоғамдық келісімді, мәдени әртүрлілікті және ұлттық бірегейлікті көркем әрі әсерлі түрде бейнелей алды. Туындылардан тек сурет қана емес, терең ой мен авторлық көзқарас, ұлттық бірлікті бағалаудың биік үлгісі байқалды.
Байқауға Қазақстан халқы Ассамблеясының Түркістан облысындағы құрылымдары, этномәдени бірлестіктердің жетекшілері мен мүшелері, сондай-ақ «Ассамблея жастары» РҚБ Түркістан облыстық өкілдігі белсене атсалысты. Олар бұл байқауды этносаралық татулықты нығайтудағы маңызды мәдени оқиға ретінде бағалап, шығармашылық ізденістің жаңа деңгейін көрсеткен шара екенін атап өтті.
Қазылар алқасының шешімі бойынша:
-
1-орын — Самат Мырзалиевке бұйырды;
-
2-орын — Мақсат Шағырбай;
-
3-орын — Нуриддин Искаков ие болды.
Жеңімпаздар мен жүлдегерлерге арнайы Дипломдар, Алғыс хаттар және құнды сыйлықтар табысталды. Сонымен қатар, байқауға белсене қатысқан өзге де фотографтар марапатсыз қалған жоқ — олардың еңбегі де лайықты түрде бағаланды.
Іс-шара соңында ұлттық мәдениетті насихаттауға бағытталған жергілікті өнерпаздардың концерттік бағдарламасы ұйымдастырылды. Ән мен күй, дәстүрлі өнер мен заманауи ырғақ үйлесім тапқан бұл концерт көрермендерге ерекше әсер сыйлады.
