Түркістан қаласының әкімі Әзімбек Пазылбекұлы Өзбекстан Республикасынан арнайы келген инвесторлар делегациясымен ресми кездесу өткізді. Кездесу барысында тараптар инвестициялық әріптестікті нығайтып, қаланың экономикалық әлеуетін арттыруға бағытталған маңызды жобаларды талқылады. Атап айтқанда, қала іргесіндегі әуежай аумағында заманауи балық шаруашылығы кластерін құруға арналған жаңа инвестициялық жобаның жүзеге асырылу барысы басты назарға алынды.
Кездесу аясында қала басшысы шетелдік инвесторлармен бірге жобаның жоспарланған жер телімін арнайы аралап көрді. Онда олар инфрақұрылымдық жағдаймен, су ресурстарының мүмкіндіктерімен, сондай-ақ инвестициялық климатпен жан-жақты танысты. Әкім тарапынан бұл жобаның Түркістан қаласы үшін әлеуметтік-экономикалық маңыздылығы атап өтілді.
Аталған жобаға Өзбекстандық инвесторлар тарапынан жалпы сомасы 5 миллион АҚШ доллары көлемінде жеке инвестиция тарту жоспарланып отыр. Жобаның жалпы аумағы 100 гектарды құрайды. Оның ішінде 70 гектар су қоймаларын орналастыруға, 10 гектар интенсивті балық өсіру бассейндеріне бөлінсе, қалған 20 гектар әкімшілік ғимараттар, өндірістік кешендер және туристік инфрақұрылым нысандарына арналмақ.
Жобаның аясында инкубациялық құрылғылар, шабақ және балапан балық өсіретін арнайы шаруашылықтар, балық өсіруге арналған заманауи интенсивті су айдындары салынады. Бұған қоса, туристік бағытты дамыту мақсатында 200 орындық заманауи қонақүй мен ұлттық тағамдар ұсынылатын мейрамхана салу көзделіп отыр. Бұл туристер мен қала қонақтары үшін қосымша демалыс орны болмақ.
Жоба толық іске қосылған жағдайда жылына 1000 тонна жоғары сапалы балық, 50 миллион дана шабақ және 400 мың дана балапан балық өндіру жоспарланған. Бұл тек ішкі нарықты қамтамасыз етіп қана қоймай, экспорттық әлеуетті де арттыруға мүмкіндік береді. Сонымен қатар, жоба нәтижесінде 100-ден астам тұрақты жаңа жұмыс орны ашылып, жергілікті тұрғындар үшін табыс көздері кеңеймек.
Инвестициялық жоба алты кезең бойынша жүзеге асырылады. Толық іске қосу мерзімі — екі жыл деп жоспарланған. Қазіргі таңда екі елдің кәсіпкерлері мен тиісті құрылымдары арасында өзара ынтымақтастықты бекітуге бағытталған құжаттар дайындалу үстінде. Соның ішінде инвестициялық меморандум жобасы қарастырылып, жақын арада екіжақты келісімге қол қойылады деп күтілуде.
Бұл жоба Түркістан қаласының агроөнеркәсіптік кешенін дамытып, аймақ экономикасына тың серпін береді деп сенеміз.
