Түркістан облысы халықаралық инвестициялық әріптестікті дамытуда тағы бір маңызды қадам жасады. Өңір басшысы Нұралхан Көшеров Мажарстаннан келген ресми делегациямен кездесті. Басқосу барысында ауыл шаруашылығы саласындағы ықпалдастық мәселелері талқыланып, ірі жобалардың болашағы сөз болды. Бұл туралы Түркістан облысы әкімінің баспасөз қызметіне сілтеме жасаған Todayinfo ақпараттық агенттігі хабарлайды.
Кездесуге Венгрияның Алматыдағы бас консулы Саболч Карой Сёке, Сыртқы сауда жөніндегі дипломатиялық өкілі Иштван Тибор Ковач және Венгрияның ірі өнеркәсіптік ұйымдарының бірі – «UBM Group» компаниясының жетекшілері қатысты.
Тараптар Қазақстан мен Мажарстан арасындағы экономикалық ынтымақтастықты нығайтып, Түркістан облысында заманауи құрама жем зауытын салу жөніндегі бастаманы талқылады. Бұл жоба – тек екі ел арасындағы қарым-қатынастың жаңа деңгейге көтерілуі ғана емес, сонымен қатар өңір экономикасына тың серпін беретін маңызды инфрақұрылымдық бастама болмақ.
Облыс әкімі Нұралхан Көшеров Түркістан өңірінің инвестициялық мүмкіндіктеріне тоқталып, зауытты дәл осы аймақта салудың тиімділігін жан-жақты түсіндірді. Қолайлы логистика, еңбек ресурстарының қолжетімділігі, аграрлық әлеует және мемлекеттік қолдаудың аясында жаңа кәсіпорынның табысты жұмыс істеуіне барлық мүмкіндік бар екенін атап өтті.
Ал жоспарланып отырған зауыттың жылдық қуаты – 200 мың тонна. Жоғары технологиямен жабдықталатын өндіріс ошағы ішкі нарықты сапалы жеммен қамтамасыз етіп қана қоймай, көрші елдерге де өнім экспорттауды көздейді. Жоба іске асқан жағдайда өңірде жаңа жұмыс орындары ашылып, ауыл шаруашылығы саласының инфрақұрылымы жаңаша дамиды.
Айта кетейік, 1996 жылы құрылған «UBM Group» – Венгриядағы жетекші жем өндіруші холдингтердің бірі. Қазіргі таңда жылына 450 мың тонна құрама жем шығарып отырған бұл компания ел ішінде 4 зауытқа иелік етеді. Сонымен қатар, ол майлы дақылдар мен астық өнімдерінің ірі трейдері ретінде танымал. Компания өнімдерін Еуропа мен Азиядағы 15 мемлекетке экспорттайды, ал жылдық сауда айналымы 1,5 млн тоннадан асады.
Кездесу барысында тараптар өзара тиімді әріптестікті одан әрі дамытуға дайын екендіктерін білдіріп, бірқатар болашақ жобалар бойынша ниеттестік танытты.
