Түркістан қаласының әкімі Әзімбек Пазылбекұлы кезекті көшпелі кездесуін Сауран секторында өткізіп, тұрғындармен жүздесті. Ашық диалог форматында өткен басқосуда қала басшысы 2024 жылы осы сектор тұрғындары тарапынан көтерілген мәселелердің шешілу барысын баяндап, атқарылып жатқан және алдағы уақытқа жоспарланған жұмыстармен жан-жақты таныстырды, деп хабарлайды Todayinfo ақпараттық агенттігі.
Кездесу барысында тұрғындар аула тазалығы, жол сапасы мен қауіпсіздігі, ойын алаңдарының жетіспеушілігі, қоғамдық көлік қозғалысының тұрақсыздығы, жарықтандыру және инженерлік инфрақұрылым бойынша түйткілді мәселелерді көтерді. Әкім әрбір сұраққа жеке тоқталып, нақты жауаптар берді. Сонымен қатар, жауапты мекеме басшыларына тиісті тапсырмалар жүктелді.
Қазіргі таңда Сауран секторында бірқатар инфрақұрылымдық жұмыстар атқарылуда. Атап айтқанда, А.Жангелдин көшесінде балаларға арналған жаңа ойын алаңшасы салынуда. Б.Майлин көшесіндегі айналма жолда шағын сәулет формаларын (МАФ) орнату басталды. №1 және №2 мөлтек аудандарында аулаларды абаттандыру, ойын алаңдарын жөндеу және жарық шамдарын ретке келтіру жұмыстары жүргізілуде. Бұл жобалар тұрғындардың өмір сүру сапасын арттыруға бағытталған.
Сонымен қатар, О.Жарылқапов көшесіне жол белгілері орнатылып, Әл-Фараби көшесіндегі жол жөндеу жұмыстары толық аяқталды. Энергетиктер көшесінде аулаішілік абаттандыру жұмыстары басталды. Мұның бәрі қала инфрақұрылымын жүйелі жақсартуға бағытталған кешенді шаралардың бір бөлігі.
Сектордағы жаңадан қоныстанған тұрғын үйлерді ауыз сумен қамтамасыз ету үшін су тарту және қайта құру жұмыстары жоспарланған. Қазір осы бағыттағы 2-кезек жобасының жобалық-сметалық құжаттамасы әзірленіп жатыр. Құрылыс жұмыстарын 2026 жылы бастау көзделуде.
Кездесу соңында Әзімбек Пазылбекұлы тұрғындарды жеке қабылдап, олардың өтініш-шағымдарын тыңдады. Әрбір мәселе бойынша тиісті құрылымдарға нақты тапсырмалар берілді.
Айта кетейік, Түркістан қаласы әкімінің халықпен кездесулері жалғасуда. Бүгін, 28 мамыр күні сағат 15:00-де әкім Сандыбаев көшесіндегі №18 мектепте тұрғындармен кездесті. Ертең, 29 мамырда кездесу сағат 10:00-де – Мәдени рухани орталықтағы «Ұлы Дала орталығы» кешенінде, ал сағат 15:00-де ӘІО-ның 9-шы көшесінде орналасқан №33 мектепте өтеді.
Бұл кездесулер қаланың барлық секторларындағы өзекті мәселелерді назарға алып, халықтың сұраныстарына жедел жауап беруге бағытталған.
