Фото: Анадолу
Түркия Ресей мен Украинаны өз аумағында келіссөздер өткізуге тағы да шақырды. Анкара қақтығысты реттеу бойынша Еуропа елдерімен кеңесу қажет деп есептейді. Бұл туралы Түркияның сыртқы істер министрі Хакан Фидан мәлімдеді, деп хабарлайды Тodayinfo ақпараттық порталы.
«Біз екі тарапқа келіссөздерді біздің жерімізде өткізу туралы ұсыныс жасадық, бірақ кейбір ерекшеліктер бар… Қазіргі уақытта екі тарап және АҚШ алдын ала келіссөздер кезеңінде. Менің ойымша, АҚШ бейбітшілік жоспарын әзірлеу үстінде», – деді Фидан TRT World арнасына берген сұхбатында.
Министр Еуропа елдерінің Украина бойынша келіссөздерге ЕО-ны тарту қажет деген пікіріне тоқталып, бұл ұстанымды «орынды» деп бағалады.
«Еуропамен кеңесу қажет, олар да бұл үдерістің бір бөлігі болуы керек, дәл Түркия сияқты. Біз олардың келіссөздерге қатысу құқығын мойындаймыз, бірақ, өкінішке қарай, Еуропа бізді дәл солай қабылдамайды», – деді Фидан.
Оның айтуынша, Түркия Ресеймен де, Украинамен де тығыз байланыста болғандықтан, келіссөздер процесінде ерекше рөл атқара алады.
