Қырғызстанда мемлекеттік лауазымдарға қойылатын талаптар күшейтілді, деп хабарлайды Todayinfo.
Енді соттылығы бар, тіпті жазасын өтеп біткен және қылмыстық ісі тоқтатылған тұлғалар президент бола алмайды. Бірақ мұның қазіргі президентке қатысы бар-жоғы айтылмаған.
Сондай-ақ осы тұлғалар келесі лауазымдарға үміткер бола алмайды:
– Жогорку Кенеш депутаты;
– Министрлер кабинетінің төрағасы мен мүшелері;
– Атқарушы билік органдарының басшылары;
– Орталық сайлау комиссиясының мүшелері;
– Ұлттық банк басқармасының төрағасы, орынбасарлары және мүшелері;
– Есеп палатасының аудиторлары.
Жогорку Кенеш бұл заңды 2025 жылғы 18 маусымда қабылдаған.
Құжаттың мақсаты — азаматтардың мемлекеттік билікке деген сенімін арттыру, жоғары лауазымды тұлғалардың беделін сақтау және заң үстемдігін нығайту деп көрсетілген.
Айта кетейік, елдің қазіргі президенті Садыр Жапаров 2012 жылы Қырғызстанда билікті күшпен басып алмақ болды деп айыпталып, 2013 жылы бір жарым жылға бас бостандығынан айырылған. Кейін елге оралған соң тағы да түрлі қылмыстық баптар бойынша жауапқа тартылып, 2017 жылы 11 жыл 6 айға сотталды. 2020 жылы қазан айында елдегі жаппай наразылықтар кезінде жақтастары оны қамаудан босатып, Жоғарғы сот үкімін жойды. Саяси ахуалдың шиеленісуі нәтижесінде Жапаров премьер-министр, кейін уақытша президент болды. Ал 2021 жылғы 10 қаңтарда өткен сайлауда 79,2% дауыспен Қырғызстан Президенті болып сайланды.
Садыр Жапаров – Қырғызстан тарихындағы түрмеден шығып, бірден ел басқарған алғашқы саясаткер. Оның билікке келуі халық наразылығы мен саяси тұрақсыздықтың тікелей салдары ретінде бағаланады.
Фото: Gov.kg
