Тұмау — бұл бүкіл әлемде тараған тұмау вирустары тудыратын жедел респираторлық инфекция, ортомиксовирустарға жатады. Бүкіл дүниежүзінде тұмаумен және басқа да ЖРВЖ жыл сайын миллиондаған адам ауырады.Тұмау жеңіл де, ауыр да өтуі мүмкін, ол жиі синуситтерге, құлақ ауруларына әкеліп, пнемониямен асқынуы және кей жағдайда өлімге де әкелуі мүмкін.
“Бүгінгі күнге облыс бойынша эпидемиологиялық жағдай тұрақты. 1-қазаннан бастап сырқаттанушылықтың жаңа эпидемиологиялық маусымы басталады. Сырқаттанушылықтың көтерілуі қарашадан басталып, қаңтар, ақпан айларында шарықтау шегіне дейін жетеді.
Жыл сайын сырқаттанушылықтың негізгі бөлігін 14 жасқа дейінгі балалар құрайды, сырқаттанушылықтың 50-70% баларға тиесілі”,- деп атап өтті Жетісу облысы СЭБД басшысының орынбасары Индира Кунбасова.
Тұмау жұқпасының алдын алудың ең тиімді шарасы – тұрғындарды иммундаумен қамту. Вакцина балалар мен ересектерді аурудың ауыр түрлерінен қорғайды, ауруханаға жатпай аурудың жеңіл өтуіне көмектеседі.
2024-2025жж. эпидмаусымға барлығы 82 500 доза вакцина жергілікті бюджет есебінен сатып алынды, облыс халқының 12%н қамту жоспарланды.
Вакцина Ресей Федерациясында өндірілген, «Гриппол плюс» деп аталады. Осы вакцина 9-жыл қолданылуда. Жалпы тұмауға қарсы екпе елімізде 2010 жылдан бері жүргізіліп келеді.
Иммундау міндетті түрде дәрігердің тексеріп қарап, денсаулық жағдайы бағаланғаннан және екпеге рұқсат берілгеннен кейін арнайы егу кабинетінде жүргізіледі. Облыста 449 егу пункті ұйымдастырылған.
Иммундау қауіпті топтағы адамдарға жүргізіледі:
1) ұйымдасқан жабық мекемелердегі (балалар үйі, мүгедектер, қарттар үйі, мектеп-интернаттары) адамдар,
2) жиі ауыратын иммунитеті төмен балалар,
3) созылмалы аурулары бар ересек адамдар,
4) медициналық қызметкерлер,
5) 2-ші, 3-ші триместрдегі жүкті әйелдер.
Арнайы емес алдын алу шараларын да естен шығармауымыз керек:
* дәрумендер қолдану,
* тиімді тамақтану, сұйық тағам түрлерін молынан пайдалану,
* үй-жайларды жиі желдету,
* жеке бас гигиенасын сақтау (жиі қолды сабынмен жуу),
* түшкіріп, жөтелген кезде ауызды/мұрынды бет орамалмен жабу,
* бетперде қолдану,
* халық тығыз орналасқан жерлерге бармаған дұрыс!
