Түркістан қаласының әкімдігі Түркістан Теміржол Вокзалын жаңғыртуға бағытталған нақты қадамдарды қолға алуда
Түркістан қаласына алғаш рет қадам басқан туристер мен қонақтардың қала көркіне баға беруі ең алдымен әуежай мен теміржол вокзалынан басталады. Осы тұрғыдан алғанда, Түркістан Теміржол Вокзалы қаламыздың тарихи әрі маңызды нысаны болып табылады. 1904 жылдан бері қызмет көрсетіп келе жатқан вокзал – тек көлік қатынасы ғана емес, Түркістанның тарихи ескерткіші де болып саналады. Алайда, қазіргі таңда вокзалдың жағдайы Түркістанның заманауи келбетін толық көрсетуге кедергі келтіріп отыр.
2022 жылы вокзалға күрделі жөндеу жұмыстарын жүргізу мақсатында Инфрақұрылым және коммуникациялар бөлімі арқылы жөндеу жұмыстары басталған болатын. Бірақ, жөндеу жұмыстарының кешіктірілуі және орындалған жұмыстардың жеткіліксіздігі себебінен вокзал әлі күнге дейін толық қалпына келтірілмей отыр. Қазіргі таңда вокзалдың сыртқы фасады мен ішкі инфрақұрылымдық жүйелерінде бірқатар мәселелер бар: әжетхана, кәріз жүйесі, ауыз су және кіреберіс қауіпсіздік жүйесі тозып, жарамсыз күйге жеткен. Бұл жағдайлар вокзалдың қызмет көрсету сапасын төмендетіп, қалаға келушілердің жайлылығы мен қауіпсіздігіне әсер етуде.
Түркістан қаласының әкімі Әзімбек Пазылбекұлы вокзалдың мәселелерін шешу үшін арнайы аралау жұмыстарын жүргізіп, орын алған ақауларды анықтады. Бүгінгі күні вокзалды қайта жаңғырту, инфрақұрылымды жақсарту және туристерге жайлы жағдай жасау мақсатында арнайы жиын өткізілді. Жиын барысында тиісті сала өкілдерінің баяндамалары тыңдалып, нақты тапсырмалар берілді. Әкімдік тарапынан қойылған міндеттерге сәйкес, вокзалдың барлық жүйелерін жаңғыртып, қаламыздың имиджін көтеру мақсатында жұмыстар жеделдетілетін болады.
Әзімбек Пазылбекұлының айтуынша, вокзал – Түркістанның бет-бейнесі. Сондықтан, осы нысанды қайта қалпына келтіріп, келушілерге лайықты қызмет көрсету жағдайын жасау әкімдіктің басты міндеттерінің бірі. Түркістан қаласы әкімдігі вокзал инфрақұрылымын жаңарту арқылы қала көркін жақсарту және туристерге қолайлы жағдай ұсыну жұмыстарын әрі қарай жалғастыра бермек.
