Туризм және спорт министрі Ербол Мырзабосынов блиц бойынша командалық әлем чемпионатында күміс жүлдеге ие болған KazChess шахмат құрамасымен салтанатты кездесу өткізді. Аталған чемпионат биылғы жылдың 11-15 маусым аралығында Лондонда Халықаралық шахмат федерациясы (ФИДЕ) аясында өтті. Бұл туралы Todayinfo ақпарат агенттігі хабарлайды.
Жарысқа әлемнің түкпір-түкпірінен 52 команда қатысты. Қазақстан құрамасы блиц пен рапид шахмат бойынша өткен осы әлемдік додада жоғары нәтиже көрсетіп, командалық есепте күміс жүлдені иеленді. Сонымен қатар, қазақстандық спортшылар 6 жеке медаль жеңіп алды, оның 2-еуі – алтын.
Кездесу барысында министр Ербол Мырзабосынов бұл жетістікті Қазақстан шахмат мектебінің жоғары деңгейін дәлелдейтін тарихи оқиға екенін атап өтті.
– Мемлекет басшысы бұқаралық спортты дамыту – ел алдындағы басым міндеттердің бірі екенін бірнеше рет атап өтті. Сіздердің бұл жеңістеріңіз – тек жеке табыс емес, күллі Қазақстан халқы үшін үлкен мақтаныш. Бұл еліміздің әлемдік деңгейдегі мықты шахмат мектебі бар екенін айқын көрсетті, – деді Ербол Мырзабосынов.
Халықаралық аренада еліміздің атын абыроймен шығарып, жоғары спорттық жетістікке жеткені үшін KazChess құрамасының мүшелері – гроссмейстер Дармен Садвақасов, команда капитаны әрі күміс жүлдегер Гүлмира Дәулетова, сондай-ақ Алдияр Ансат, Елназ Қалиахмет және Ислам Айтен алғыс хаттармен марапатталды. Ішкі регламентке сәйкес, олар спорттағы үздік нәтижелері үшін ақшалай сертификаттарға ие болды.
Сондай-ақ шахмат спортының дамуына қосқан үлесі үшін Қазақстан шахмат федерациясының президенті Тимур Турлов «Құрметті спорт қызметкері» төсбелгісімен марапатталды.
– Біз кез келген жетістік – бұл тек спорттық нәтиже мен жеке жетістік емес, сонымен бірге мемлекеттің жүйелі қолдауының көрсеткіші екенін жақсы түсінеміз. Бұл қолдауды біз балалар шахматын дамытудан бастап, елімізде халықаралық турнирлерді өткізгенге дейінгі барлық кезеңде сезінеміз. Бұл бізге шабыт береді, күш-қуат сыйлайды және одан да биік мақсаттар қоюға мүмкіндік береді, – деді Тимур Турлов.
2025 жылдың алғашқы жартыжылдығының қорытындысы бойынша қазақстандық шахматшылар халықаралық аренада 81 медаль жеңіп алды. Оның ішінде 34-і – алтын, 21-і – күміс, 26-сы – қола. Бұл – еліміздегі шахмат спортының жүйелі түрде дамып, бәсекеге қабілеттілігінің артқанын айқын көрсетеді.
