Үш ЖЭО-ны салуға қаржы таппаған Ресей Қазақстанда АЭС-ті қалай салады?
деп хабарлайды Todayinfo.kz ақпараттық порталы Tizgin.kz-ке сілтеме жасап.
Қазақстанда Көкшетау, Өскемен және Семей қалаларында салынуы тиіс үш жылу электр орталығының (ЖЭО) құрылысы ресейлік компанияның қаржылық қиындықтарына байланысты кейінге қалды. Бұл туралы энергетика вице-министрі Сұңғат Есімханов мәлімдеді.
Ресей жобадан кетті, Қытай технологиясы тартылды
Бастапқыда ресейлік «Интер РАО-Экспорт» компаниясы ЖЭО-ны қаржыландырып, мердігер ретінде қатысуы керек болатын. Алайда Ресейде негізгі мөлшерлеменің 21%-ға дейін өсуі жобаны қаржылай тиімсіз етті. Соның салдарынан Қазақстан Үкіметі Көкшетау ЖЭО құрылысын Самұрық-Энерго арқылы өз бетінше бастаған. Құрылыс қытайлық технологиямен іске асуда.
Өскемен мен Семейдегі ЖЭО жобаларына қатысты шешім де жуырда қабылданбақ. Оларды да отандық мердігерлер немесе Самұрық-Энерго жүзеге асыруы мүмкін.
«Интер РАО» жобадан толық кетті ме?»
Бұл сұраққа вице-министр: «Иә», – деп нақты жауап берді.
АЭС мәселесі – басқа компания
Tizgin.kz тілшісі вице-министрден:
«Үш ЖЭО-ны салуға ақша таппаған Ресей Қазақстанда АЭС-ті қалай салады?»
– деп сұраған. Бұған Есімханов:
«Бұл екі бөлек жоба, екі бөлек компания. ЖЭО – Интер РАО, АЭС – Росатом», – деп жауап берді.
Алайда қаржыландыру мәселесі АЭС жобасына да әсер етуі мүмкін екенін жоққа шығарған жоқ. Бұл сұраққа нақты жауапты Атом энергетикасы агенттігі беруі тиіс екенін айтты.
Еске сала кетейік, бұған дейін Қазақстандағы алғашқы атом электр станциясын салу құқығы Росатом компаниясына берілгені жарияланған болатын. Алайда қазіргі жағдай бұл жобаның тағдырына қатысты да сұрақтар туындатып отыр.
