Қазақстан Президентінің бастамасымен іске қосылған «Ауыл аманаты» бағдарламасы үшінші жыл қатарынан Қарағанды облысының ауыл тұрғындарына өз кәсібін дамытуға қолдау көрсетіп келеді. Жеңілдікті шағын несиелер ауыл тұрғындарына бизнес ашуға, жаңа жұмыс орындарын құруға және туған ауылдарын көркейтуге мүмкіндік берді, деп хабарлайды Todayinfo ақпараттық агенттігі.
Новоузенка ауылындағы фермер Қайрат Әбиев бағдарламаның көмегімен ірі қара мал шаруашылығын дамытуда. Ол 140 бас ірі қара мал ұстап отыр және болашақта мал басын көбейтуді жоспарлап отыр. Бағдарлама аясында алған жеңілдікті несиенің арқасында фермер жаңа трактор сатып алған.
– Бұрын ескі техникамен жұмыс істейтінбіз, жиі бұзылатын еді. Ал жаңа трактор шаруашылықты басқаруда тиімділік пен жылдамдықты арттырды, – дейді Қайрат Әбиев.
Үштөбе ауылында кәсіпкерлер Азамат Амантайұлы мен Жасұлан Смағұлов ауыл шаруашылығы кооперативтерін құрып, жылыжай жобасын жүзеге асыруда. Олар көкөністерді жыл бойы өсіріп, тұрғындарға қолжетімді бағамен сатуды жоспарлап отыр. Кәсіпкерлер жылыжай жұмысын аяқтап, тропикалық жемістер өсіруді де қарастыруда.
Сондай-ақ Үштөбеде жаңа шағын сүт зауыты ашылды. Жабдықтар «Даму» қорының қолдауымен сатып алынған. Қазіргі уақытта сүзбе, май және ірімшік өндірісі жолға қойылған, ал болашақта өнім түрлерін көбейту көзделген.
– Әзірге сүт жеткіліксіз, бірақ Ботақара ауылындағы сүт қабылдау пунктінің ашылуымен жағдай жақсарады деп сенеміз, – дейді зауыт технологы Кенжебай Бекмұратов.
«Ауыл аманаты» бағдарламасы іске қосылғаннан бері Қарағанды облысында 670-тен астам жеңілдікті шағын несие берілді. Жалпы сомасы – 5,6 млрд теңге. Бағдарлама ауыл шаруашылығы, туризм, жартылай фабрикаттар өндіру, жем-шөп өндірісі сияқты түрлі салаларда жобаларды жүзеге асыруға мүмкіндік берді.
2023 жылы Бұқар жырау ауданында 128 жоба іске асырылып, аймақтағы белсенді ауылдар – Ботақара, Үштөбе және Ростовка тұрғындары ерекше нәтижелерге қол жеткізді. Биылғы жылы облыста «Ауыл аманаты» бағдарламасы бойынша тағы 300-ге жуық жобаны қолдау жоспарланып отыр.
Облыстың ауыл шаруашылығы кооперациясын дамыту «Бір ауыл – бір өнім» моделі бойынша жүргізілуде. Бұл тәсіл әр ауылдың ерекшелігіне бейімделген жобаларды жүзеге асырып, аймақ экономикасын дамытуға ықпал етеді.
Бағдарлама ауыл тұрғындарына тек экономикалық тұрақтылық қана емес, әлеуметтік-мәдени жаңғырудың негізін қалауға мүмкіндік беруде.
