Алматыдағы «Шымбұлақ» тау-шаңғы курортында шетелдік қонақтар мен қызметкерлер арасында жанжал шығып, соңы жаппай төбелеске ұласты. Курорт әкімшілігінің мәліметінше, алдымен ауызша туындаған кикілжіңнің соңы жаппай төбелеске ұласқан. Туристер кассирдің қызметіне қанағаттанбаған, деп хабарлайды Todayinfo.
«Бұл қылмысқа қатысы бар деген күдікпен бес адам ұсталып, уақытша ұстау изоляторына қамалды. Қазіргі уақытта оқиғаның объективті мән-жайлары анықталып жатыр», – деп хабарлады Алматы қалалық полиция департаменті.
Тау-шаңғы курортына демалуға келген бір топ турист кассирдің жұмысына қанағаттанбай, оны балағаттап, қорлаған. Оның соңы ақыры төбелеске ұласқан.
«Шымбұлақ» әкімшілігінің түсіндіруінше, шетелдік қонақтардың картасында (ски-пасс) қаражат таусылып, оны толтыру үшін кассаға келген. Кассир осы жұмыс бойынша уақытша орынан кетіп қалады. Туристер кассирді небәрі 2 минут қана күткен.
«Туристер кассирді күтіп тұрғанына ашуланып, ұрысып, балағаттай бастайды. Аз уақыттан соң кассир қайтып оралады да оларға қызмет көрсетуін жалғастырады. Бірақ туристердің бірі ашуын баса алмай, кассирге тиісіп, қорлап сөйлеуін тоқтатпағандықтан оның соңы төбелеске ұласқан. Ашуланшақ турист ұлт араздықты қоздыратын сөздерді айтқан», — делінген хабарламада.
Аталған дауға қатысты бес адам ұсталып, олардың бәрі Медеу аудандық ПБ уақытша ұстау изолияторына қамалды.
