Вирустық А гепатиті немесе боткин ауруы – А гепатиті вирусынан туындаған бауырдың жіті инфекциялық ауруы. Климаты жылы және санитариялық жағдайы төмен елдерде сырқаттанушылық көп тіркеледі.
Жұқтыру кезеңінен аурудың алғашқы белгілері пайда болғанға дейінгі кезең орта есеппен 35 күн. Инфекция көзі а – науқас адам, сыртқы ортаға ең қауіптісі сарғаю алды кезеңіндегі науқастар. Аурудың жасырын және сарғаюсыз кезеңінде жұқпаны жұқтыру процесі өте жоғары болады.
Вирустық «А» гепатитіне күз-қыс айларындағы маусымдылық тән, бірақ жаз айларында ыстық мезгілде су тұтыну күрт жоғарылағанда тұрғындардың сапасыз ауыз суын пайдалануы орын алады. Күзде жағдай ушығады, жаңадан құрылған ұйымдастырылған ұжымдар арасында (мектеп, мектеп – интернаттары, балабақша) науқас адам болған жерде жұқпа еніп, жұқпаның тез және кеңінен таралуына мүмкіндік пайда болады.
Вирустық А гепатитімен ауырғандардың барлығы толығымен сауығады, сирек жағдайда вирустық А гепатитін жұқтырғандар фулминантты гепатиттен өлімге ұшырауы мүмкін. Аурудан сауыққаннан кейін ағзада өмір бойына ауруға қарсы тұрақты иммунитет қалыптасады, ауырған адам қайтадан ауырмайды.
«Сонымен қатар, вирустық «А» гепатитінің кеңінен таралуы көбінесе ұйымдастырылған ұйымдарда болғандықтан жұқпа тіркелген мектептерде келесі шаралар атқарылуы қажет: бастауыш, негізгі орта білім беру ұйымдарындағы оқушыларды мектептің үй-жайларын жинауға тартуға жол бермеу, байланыста болған адамдар науқаспен байланысты үзгеннен кейін күнтізбелік отыз бес күн бойы апта сайын дәрігердің тексеріп-қарауымен медициналық бақылау, бақылау кезеңінде жаңадан балалар қабылдауға және байланыста болған балаларды бір топтан екінші топқа, бір мекемеден екінші мекемеге ауыстыруға жол бермеуді, ауру жағдайы тіркелген сынып үшін кабинетте оқыту жүйесін тоқтату, сырқаттанушылық өршіген кезде соңғы жағдай тіркелген күннен бастап инкубациялық мезгілде барлық бастауыш және негізгі орта білім беру ұйымы бойынша кабинетте оқыту жүйесін тоқтату, залалсыздандыру, жуу құралдарымен және тазалау жабдықтарымен қамтамасыз ету, оқушылар арасында вирустық гепатит «А» сырқаттанушылығының клиникалық белгілері және алдын алу мәселесі бойынша түсіндіру жұмыстарын ұйымдастыру», — дейді Жетісу облысы СЭБД басшысының орынбасары Индира Кунбасова.
Денсаулықты сақтау және жұқпадан қорғау үшін бірнеше қарапайым және сонымен бірге тиімді ережелерді есте ұстаған жөн:
— көкөністер мен жемістерді қолданбас бұрын мұқият жуыңыз;
— камақтанар алдында, дәретханадан кейін, серуендеуден кейін қолыңызды жуыңыз;
— тек қайнатылған немесе бөтелкедегі суды ішіңіз;
— рұқсат етілген су айдындарында суға түсіңіз;
— жаман әдеттерден арылыңыз, тырнақтар мен қарындаштарды тістемеңіз.
