Фото: kazhenov.aslan парақшасынан
Еркін күрестен әлем чемпионы атанған Нұрқожа қайпанов бір жылға жуық уақыттан бері өзіне федерациядан сыйға берілген пәтерді әлі алмағанын мәлімдеді, деп хабарлайды Todayinfo.kz ақпарат агенттігі.
Аталған жағдай туралы спортшы Нұрсейіт Жылқышыбаймен әңгіме барысында атап өтті.
«Былтыр федерацияның қорытынды жиынында пәтер сертификаты берілді. Бірақ пәтердің өзін беру жағы бір жылдан бері созылып кетті. Сұрап жазған едік, оған федерация тарапынан жауап болмады. Нақты болмай жатыр. Берілсе жақсы болар еді. Пәтерден пәтерге көшіп жүрмін. Қазір Талғарда тұрып жатырмын. Шық деп жатқан жоқ, тек жаттығуға күн сайын қатынап жүрмін. Кептелісте 2-3 сағат тұрамын», — деді балуан.
Осыдан кейін спорт журналисі Аслан Қаженов те желідегі парақшасында жазба жариялады.
«УӘДЕ ҚАШАН ОРЫНДАЛАДЫ?! Нұрқожа Қайпановтың сұхбатын көрген шығарсыз. Осы сертификатты алып, пәтерді алмағанына бір жыл болыпты. Өте ұят жағдай. Әлем чемпионы әлі күнге дейін бауырының үйінде тұрады. Өз отбасы бар. Өз өмірі бар. Бірақ біреудің баспанасын паналауға мәжбүр. Жаттығу үшін Талғардан Алматыға қатынап жүр. Қанша уақыт жоғалтады?! Қанша жүйке жұқартады?! Масқара ғой. Сұхбаттың шыққанына бір тәулік болды. Жауапты тараптар үнсіз. Негізі уәде берілді ме, орындалуы керек. Қазақтың батырлары тентіреп жүрмеуі керек! Қазақ чемпиондарының еңсесі езілмеу керек! Жақын күндері мәселе шешімін табады деп үміттенеміз…», — деп жазды ол.
