30 тамызда Львов қаласында Украина Жоғарғы Радасының 6–9 шақырылымдарының депутаты, 8-ші шақырылымдағы парламент спикері Андрей Парубий оққа ұшып, көз жұмды. Бұл туралы ұлттық полиция мен жергілікті билік хабарлады, деп жазады Todayinfo.
«Украинская правда» дерегінше, саясаткерге жеті рет оқ атылған. Оқиға Львов қаласында болған. Парубий оқиға орнында көз жұмған.
Президент Владимир Зеленский бұл қанды оқиғаға байланысты пікір білдірді.
– Ішкі істер министрі Игорь Клименко мен бас прокурор Руслан Кравченко маған Львовта болған қайғылы жағдайдың алғашқы мәліметтерін жеткізді. Андрей Парубий қаза тапты. Оның отбасына және жақындарына көңіл айтамын. Қылмыскерді анықтау үшін барлық күштер жұмылдырылды, – деді мемлекет басшысы.
Тергеу басталып, құқық қорғау органдары қылмыстың мән-жайын анықтап жатыр.
Андрей Парубий 1971 жылы Львов облысында дүниеге келген. Львов ұлттық университетінің тарих факультетін, сондай-ақ «Львов политехника» ұлттық университетінің саясаттану және әлеуметтану мамандығы бойынша аспирантурасын тәмамдаған.
1990 жылы Львов облыстық кеңесінің депутаты болды. 1991 жылы Олег Тягнибокпен бірге «Украинаның социал-ұлтшыл партиясын» құрды. 2014 жылы Майданда қозғалысының коменданты болды.
Фото: Valentyn Ogirenko/Reuters
