Зейнетақы өседі, бірақ қалтаңыз сезбейді: Үкімет шынайы жағдайды түсіндірді
Қазақстандық зейнеткерлер үшін жаңалықтың екі ұшы бар: ресми түрде зейнетақы көлемі артады, бірақ іс жүзінде өмір сүру деңгейі жақсармауы мүмкін. Вице-премьер әрі Ұлттық экономика министрі Серік Жұманғарин қаңтар айындағы индексацияның неліктен қарттардың дастарханына айтарлықтай әсер етпейтінін ашық түсіндірді. Бұл туралы Todayinfo порталы жазды.
Ресми деректерге сүйенсек, төлемдер 10%-ға артады. Алайда, шенеуніктің айтуынша, базар мен дүкендегі бағаның өсуі бұл үстемақыны қазірдің өзінде «жұтып» қойған.
Сандар не дейді?
1 қаңтардан бастап еліміздегі ең төменгі зейнетақы мөлшері 69 049 теңгені құрайды. Бұл өзгеріс 2026-2028 жылдарға арналған республикалық бюджет туралы заңда бекітілген.
Сан жағынан қарасақ, ақша көбейгендей көрінеді. Бірақ Жұманғариннің сөзінше, бұл өсім халықтың сатып алу қабілетін арттырмайды, тек қымбатшылықпен теңеседі. Яғни, зейнеткерлер бұрынғыдан байып кетпейді, тек қазіргі деңгейін әрең сақтап қалуы мүмкін.
Инфляция бәрін «жеп» қойды
Министр жағдайды нақты цифрлармен дәйектеді. Үкімет 2026 жылға арналған инфляцияны 9-11% дәлізінде болжайды. Ал 2025 жылдың басынан бергі жинақталған нақты инфляцияның өзі 10,5%-ға жетіп үлгерген.
«Сондықтан индексация бюджеттің көтере алатын мүмкіндігіне қарай жасалды. Бірақ, өкінішке қарай, ол азық-түлік пен қызметтердің қымбаттауын толық жаба алмайды», — деді ведомство басшысы.
Қарапайым тілмен айтқанда, қосылған ақша нан мен сүттің қымбаттаған бағасын жабуға ғана жетеді.
