Фото: ББС
Украина президенті Владимир Зеленский жексенбі күні АҚШ-пен байланысын жалғастыруға ниетті екенін мәлімдеді. Ол бұл келіссөздерді жабық есік жағдайында жүргізу қажет деп санайды,деп хабарлайды Todayinfo.kz ақпарат порталы.
Лондонда өткен Еуропалық көшбасшылардың саммитінде журналистермен кездескен Зеленский АҚШ-тың Украинаға көмекті тоқтатпайтынына сенім білдірді.
Зеленский: «Путинге қолдау көрсетілмейді»
Украина президентінің айтуынша, өркениетті әлемнің көшбасшылары Ресей президенті Владимир Путинге қолдау көрсетпейді. Дегенмен, ол Украина кез келген қиындықтарға дайын екенін атап өтті.
«Біздің қарым-қатынасымыз жалғасады деп ойлаймын. Мұндай мәселелерді толық ашық талқылау дұрыс емес. Бізбен серіктес елдер үшін бұдан ешқандай пайда немесе қосымша артықшылық болмайды», – деді Зеленский.
Сондай-ақ, ол АҚШ-пен пайдалы қазбаларды жеткізу жөніндегі келісімге қол қоюға дайын екенін және бұл мәселеде Вашингтонның да мүдделі болуы мүмкін екенін айтты.
НАТО-ға мүше болу туралы мәлімдемесі
НАТО-ға мүшелік туралы сұраққа жауап берген Зеленский:
«Мені НАТО-ға айырбастауға болады. Егер мен мүшелікке қол жеткізсем, демек, миссиямды орындадым» – деді.
Алайда, ол өз орнына лайықты балама табу қиын болатынын атап өтті.
«Жай ғана сайлау өткізу жеткіліксіз. Мені сайлауға қатыстырмау керек. Бұл әлдеқайда қиын, өйткені бұл үшін менімен келіссөз жүргізу қажет», – деді Украина басшысы.
ЕО Зеленскийді қолдады
Лондонда өткен Еуропалық Одақтың шұғыл саммитінде Еуропа көшбасшылары Украинаға толық қолдау білдірді.
Еске сала кетейік, 28 ақпан күні Владимир Зеленский АҚШ президенті Дональд Трамп және вице-президент Джей Ди Вэнспен көпшілік алдында дауласқаннан кейін Ақ үйді мерзімінен бұрын тастап кеткен.
Трамп Зеленскийді «АҚШ-ты сыйламайды және бейбітшілікке дайын емес» деп айыптаған болатын. Осыдан кейін бірқатар еуропалық көшбасшылар мен ЕО басшылары Зеленскийге ашық қолдау көрсетті.
